CAF yasabye amashyirahamwe y’umupira w’amaguru muri Afurika kuyimenyesha ingamba yafashe mu gusoza umwaka w’imikino 2019/20

Mu gihe mu bihugu bitandukanye ku mugabane w’i Burayi shampiyona ziri kugirwa impfabusa kubera Coronavirus, CAF yasabye abanyamuryango bayo kugaragaza aho babogamiye mu gusoza umwaka w’imikino wa 2019/2020.

Mu ibaruwa CAF yandikiye amashyirahamwe yose tariki 26/04/2020, yayasabye kugaragaza ingamba bafashe zo gusoza umwaka w’imikino nyuma y’aho icyorezo cya Coronavirus gihagaritse ibikorwa byinshi birimo n’umupira w’amaguru.

Amashyirahamwe y’umupira w’amaguru muri Afurika yose yasabwe kwerekana aho shampiyona yari igeze, uko amakipe akurikirana ndetse n’imikino yari isigaye, ndetse bakanerekana aho igikombe cy’igihugu kigeze.

CAF yasabye amashyirahamwe yose kwerekana uburyo bateguye shampiyona n’ibindi bikombe bizakinwamo ubwo bizaba bisubukuwe cyangwa se bakabamenyesha niba bizasubikwa.

Ibi byose amashyirahamwe yasabwe kuba yabitanze bitarenze itariki 05/05/2020 kugira ngo CAF nayo itegure neza uko amarushanwa nyafurika ahuza amakipe azagenda mu mwaka utaha w’imikino.