Icyorezo cya Coronavirus cyakomotse mu Bushinwa kigakwirakwira mu bihugu hafi ya byose ku Isi birimo n'u Rwanda, gikomeje gufata intera aho magingo aya ku Isi hose abamaze kucyandura barenga Miliyoni eshatu, abarenga ibihumbi 200 bamaze guhitanwa nacyo naho abamaze gukira ni 925,924 nk'uko tubikesha Kaminuza y'ubushakashatsi ya Johns Hopkins.
Ubwo twandikaga iyi nkuru mu gitondo cy'uyu wa Kabiri tariki 28 Mata 2020, abantu bari bamaze kwandura icyorezo cya Covid-19 ni 3,077,160 naho abamaze guhitanwa nacyo ni 211, 964. Leta Zunze Ubumwe za Amerika (USA) ni yo ifite abantu benshi banduye iki cyorezo aho bangana na 1,010,507 naho abamaze kubura ubuzima muri iki gihugu ni 56,803, abamaze gukira ni bacye cyane dore ko abakiri mu bitaro ari 814, 542.
Tugiye mu Bushinwa ahakomotse iki cyorezo, ibintu biri kujya mu buryo dore ko nta bwandu bushya bukiboneka ndetse n'abarwayi bakiri mu bitaro bakaba ari bacye cyane aho ari 648 gusa nabo hafi ya bose bameze neza kuko abarembye ari 50 bonyine. Abantu bo mu Bushinwa banduye iyi ndwara kuva yakwanduka mu mpera za 2019 ni 82,836 aho iki gihugu cyakoze ibishoboka byose kikavura abanduye maze abagera ku 77, 555 bagakira.
Kuri ubu ibihugu byibasiwe cyane ku Isi n'iki cyorezo ni Leta Zunze Ubumwe za Amerika n'ibindi bihugu byo ku mugabane w'Uburayi aho twavugamo nka: Esipanye, u Butaliyane, u Bufaransa, u Budage, u Bwongereza n'ibindi. Ibihugu bigifite abarwayi benshi ba Covid-19 ni USA ifite 814,542, u Bwongereza bufite 135, 713, u Butaliyani bufite 105, 813, Ubufaransa bufite 97, 036 n'ibindi.
Mu Rwanda naho ubwandu bw'iyi ndwara bukomeje kwiyongera, gusa inkuru nziza ni uko hakomeje kuboneka benshi bakira. Ku mugoroba w'uyu wa Mbere Minisiteri y'Ubuzima (MINISANTE) yatangaje ko habonetse abantu 16 basanzwemo iyi ndwara, bituma umubare w'abayanduye bose hamwe ugera kuri 207. Amaze gukira iyi ndwara ni 93 naho abakirwaye ni 114.
Nta muntu n'umwe urapfa azize iyi ndwara ndetse Minisiteri y'Ubuzima ivuga ko abarwayi bose bavurirwa ahantu habugenewe kandi bakaba bari koroherwa. Abaturarwanda basabwe na MINISANTE gukaraba intoki kenshi, kuguma mu ngo ndetse no kwambara agapfukamunwa igihe basohotse nk'intwaro zabafasha guhashya icyorezo cya Coronavirus cyugarije Isi.
Uko Covid-19 ihagaze hirya no hino ku Isi
Uko Covid-19 ihagaze mu Rwanda n'icyo MINISANTE isaba abaturarwanda
Eng
RSS 
TANGA IGITECYEREZO