RFL
Kigali

COVID-19: Abantu bamaze kwandura ku Isi bararenga Miliyoni 1, abapfuye bararenga ibihumbi 51

Yanditswe na: Mupende Gedeon Ndayishimiye
Taliki:2/04/2020 20:49
0


Icyorezo cya Coronavirus gihangayikishije Isi kimaze guhitana ubuzima bw'abantu barenga ibihumbi 51 ku Isi mu gihe abamaze kwandura bose hamwe barenga Miliyoni imwe naho abakize ibihumbi 210.



Icyorezo cya Covid-19 giterwa n'agakoko kitwa Coronavirus cyatangiriye mu Bushinwa mu mpera za 2019, magingo aya kimaze kugera mu bihugu hafi ya bose ku Isi. Hirya no hino ku isi, imirimo yose yarahagaze keretse gusa abatanga serivise zikenewe cyane, abantu bose basabwa kuguma mu ngo zabo mu kwirinda ikwirakwira ry'iki cyorezo. Mu Rwanda, abamaze kwandura Coronavirus baragera kuri 84 nk'uko tubikesha Minisiteri y'Ubuzima.

Kuri uyu wa Kane tariki 01/04/2020 ni bwo umubare w'abamaze kwandura iki cyorezo ku Isi hose wageze kuri Miliyoni imwe. Ubwo twandikaga iyi nkuru, abanduye bari bamaze kuba 1,000,168, abahitanywe n'iki cyorezo ari 51,354. Leta Zunze Ubumwe za Amerika ni cyo gihugu gifite abantu benshi bamaze kwandura iki cyorezo aho bufite abarwayi barenga ibihumbi 235 naho abamaze gupfa bakaba barenga ibihumbi 5.

Igihugu cy'u Butaliyane ni cyo gifite abantu benshi bamaze guhitanwa n'iki cyorezo, aho bufite 13,915 mu gihe abamaze kwandura iyi ndwara muri iki gihugu barenga ibihumbi 115 naho abamaze gukira bararenga ibihumbi 18. Ikindi gihugu gifite abantu benshi bamaze guhitanwa n'iyi ndwara ni Esipanye (Spain) ifite abarenga ibihumbi 10 mu gihe abanduye barenga ibihumbi 110.

U Bushinwa bwakomotsemo iyi ndwara ntabwo kuri ubu bwugarijwe cyane dore ko umubare w'abantu bandura ku munsi wagabanutse cyane ndetse n'abarimo gukira iyi ndwara bakaba bakomeje kwiyongera. Abantu bose hamwe banduye iyi ndwara mu Bushinwa bararenga ibihumbi 81, abapfuye ni 3,318, abakize bararenga ibihumbi 76, abakiri mu bitaro ni 1863. Ni cyo gihugu cya mbere ku Isi gifite abantu benshi bamaze gukira iyi ndwara.


Amerika ku isonga mu bihugu byugarijwe cyane na Covid-19

Src: https://www.worldometers.info/coronavirus/






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND