U Bushinwa: Mu mujyi wa Shenzhen birabujijwe kongera kurya imbwa n'injangwe kubera Covid-19

Shenzen ariko yo yateye indi ntambwe, igera no ku guca kurya imbwa n'injangwe. Iri tegeko rizatangira gukurikizwa tariki 01/05/2020. Imbwa zigera kuri Miliyoni 30 ziricwa buri mwaka muri Aziya ngo bazirye nk'uko bivugwa n'ikigo Humane Society International (HSI).

Gusa mu Bushinwa, hari umubare munini w'Abashinwa batarya imbwa. Ubutegetsi bw'umujyi wa Shenzhen buvuga ko "imbwa n'injangwe byacuditse n'abantu kurusha izindi nyamaswa, kandi hari n'ahandi bibujijwe kurya izi nyamaswa nko muri Hong Kong na Taiwan".

Iki cyemezo cyishimiwe na HSI iharanira uburenganzira bw'inyamaswa. Dr Peter Li wo muri iki kigo yagize ati: "Iyi ni intambwe nziza ishobora guhagarika ubucuruzi bubi butuma mu Bushinwa hicwa imbwa zigera kuri miliyoni 10 n'injangwe miliyoni 4 buri mwaka".

Gusa mu Bushinwa nanone ubu bemeje ikoreshwa ry'urugingo ruzwi nka 'bile' rw'inyamaswa z'ibirura (bears) mu kuvura abarwaye coronavirus. Urwo rugingo rugizwe n'amatembabuzi ava mu mwijima w'ikirura, rusanzwe rukoreshwa mu buvuzi gakondo mu Bushinwa.

Abo mu miryango iharanira uburenganzira bw'inyamaswa bamaganye iki cyemezo, bavuga ko uyu atari umuti wemejwe n'abahanga ko uvura iyi virusi.

Kugeza ubu, abanduy eiyi virusi ku isi barasatira miliyoni imwe, abo imaze kwica bararenga 47,000 nk'uko bivugwa na kaminuza y'ubushakashatsi ya Johns Hopkins.

Mu Bushinwa abanduye iyi ndwara ni 81,589 naho abo yishe ni 3,318, ni imibare itangwa n'ikigo cya leta y'Ubushinwa gishinzwe ubuzima. Abahanga mu bushakashatsi mu by'ubuzima ntibarabona umuti cyangwa urukingo rw'iyi virusi bise Covid-19.

Src: BBC