Airtel Rwanda
Kigali

Imikino ya UEFA Champions League na Europa League yigijwe inyuma kubera Coronavirus

Yanditswe na: SAFARI Garcon
Taliki:2/04/2020 10:36
0

Impuzamashyirahamwe y’umupira w’amaguru ku mugabane w’i Burayi ‘UEFA’ yamaze gutangaza ko imikino yose ya Champions League na Europa League yasubitwe kugeza igihe hazafatwa ikindi cyemezo kubera icyorezo cya Coronavirus gikomeje guhitana umubare munini w’abatuye Isi.



Uyu mwanzuro wafatiwe mu nama yahuje abanyamuryango ba UEFA kuri uyu wa Gatatu tariki ya 1 Mata 2020, hifashishijwe ikoranabuhanga ry’amashusho, aho yanzuye ko n’imikino y’ibihugu yagombaga kuba muri Kamena, na yo yasubitswe.

Umuyobozi mukuru wa UEFA, Aleksander Čeferin, aherutse gutangaza ko gahunda ziri kurebwa ari ukuba imikino yasubukurwa muri Gicurasi hagati, muri Kamena cyangwa mu mpera za Kamena.

Yavuze  kandi ko kuba imikino isigaye yakinirwa mu muhezo, ari ubundi buryo bushobora gutekerezwaho.

Muri Europa League, hakinwe imikino itandatu ibanza ya 1/8 mu gihe indi ibiri yasubitswe kubera Coronavirus.

Imikino yo kwishyura ya 1/8 muri UEFA Champions League yari isigaye gukinwa ni uwa Manchester City na Real Madrid, Juventus na Lyon, FC Barcelona na Napoli ndetse na Bayern Munich na Chelsea.

Amakipe ane yo yamaze kubona itike ya ¼ ni RB Leipzig, Atalanta, Atlético Madrid na Paris Saint-Germain.

Umukino wa nyuma wa Champions League n’uwa Europa League, yari iteganyijwe mu kwezi gutaha kwa Gicurasi, tariki ya 30 n’iya 27, gusa yombi yamaze kwimurwa kubera icyorezo cya Coronavirus.


Liverpool yasezerewe muri 1/8 uyu mwaka niyo yatwaye igikombe cya UEFA Champions League cy'umwaka ushize


Chelsea niyo yegukanye igikombe cya Europa League cy'umwaka ushize





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND