Sallam Ahmed Sharaff [Sallam SK] ureberera inyungu z’umuhanzi Diamond Platnumz yabaye umuntu wa kabiri mu gihugu cya Tanzania ukize icyorezo cya COVID-19 giterwa na Coronavirus.
Kuri uyu wa kabiri Sallam yatangaje ko yavuye mu kato nyuma y’uko ibizamini by’abaganga bigaragaje ko yakize Coronavirus, avuga ko ari inkuru nziza yishimiye gutangariza Isi.
Sallam SK yagiye mu kato kuva ku wa 14 Werurwe 2020 nyuma y’uko asanganwe icyorezo cya COVID-19. Yari amaze iminsi avuye mu ngendo mu Bufaransa n’ahandi.
Yanditse ati “Nyuma y’iminsi cumi n’ine (14) ibizamini bibiri byombi byagaragaje ko nakize COVID-19 ubu navuye mu kato. Warakoze Mana. Ndashimira abadogiteri, abaganga ndetse na Leta ya Tanzania.”
Sallam atangaje ko yakize Coronavirus hashize umunsi umwe Producer wihariye wa Diamond, Lizer Classic ashyizwe mu kato nyuma y’uko yanduye Coronavirus.
Kugeza ubu Tanzania ifite abarwayi 19 ba Coronavirus, babiri bamaze gukira n’aho undi umwe yitabye Imana nk’uko bitangazwa na Minisitiri w’Ubuzima, Ummy Mwalimu.
Sallam Sk yatangaje ko yakize Coronavirus nyuma y'iminsi 14 ari mu kato
Yashimye abaganga bamwitayeho muri iki gihe na Leta ya Tanzania
Sallam SK ari mu bajyanama batanu b'umuhanzi Diamond uri mu bakomeye muri Afurika
TANGA IGITECYEREZO