RFL
Kigali

Agatambaro Kobe Bryant yakoresheje mu 2016 kagurishijwe mu cyamunara arenga Miliyoni 31Frw

Yanditswe na: Janvier Iyamuremye
Taliki:30/03/2020 11:57
0


Agatambaro Kobe Bryant yari afite ku rutugu mu 2016 asezera ku mukino wa Basketball, kagurishijwe mu cyamunara amadorali 33,077.18 [Angana na Miliyoni 31,222,113.48 Frw].



Aka gatambaro kagurishijwe kuri murandasi kuri iki cyumweru kari kumwe n’amatike abiri y’umukino wa nyuma Kobe yakinnye, aho ikipe ye ya Los Angeles Lakes yatsinze Utah Jazz amanota 101 kuri 96.

Uyu mukino wabereye mu nyubako ya Staples Center ku wa 13 Mata 2016 aho yatsinzemo amanota 60.  

Yavuze ijambo asezera ku mukino wa Basketball yubakiyemo izina asoza agira ati “Mamba out”.

Asoje ijambo rye, agatambaro yari afite ku rutugu yakoresheje yihanagura ibyuya yakanaze mu bafana gafatwa n’umwe muri bo.  

Kashyizwe mu byamunara bitandukanye ubu igiciro cya nyuma cyabaye amadorali 32,077.

Umufana wa mbere wafashe aka gatambaro yakagurishije mu cyamunara mu 2016 amadorali 8,000.  

Icyamamare mu mukino wa Basketball Bryant n’umukobwa we w’imyaka 13 bari mu bantu icyenda bahitanwe n’impanuka y’indege yabaye ku wa 26 Mutarama 2020 mu gace ka Calabasas muri Leta ya California muri Amerika.

Kobe yatwaye ibikombe bitanu bya shampiyona ya Amerika, NBA, ari mu ikipe ya LA Lakers ari nayo yakiniye yonyine. 

Afatwa nk'umwe mu bakinnyi bakomeye babayeho mu mateka ya Basketball ku Isi.

Yasize umugore we Vanessa Laine n'abana batatu b'abakobwa; Bianka Bella Bryant, Capri Kobe Bryant na Natalia Diamante Bryant w'amezi arindwi gusa.


Agatambaro Kobe Bryant yari afite ku rutugu mu 2016 asezera ku mukino wa Basketball kagurishijwe mu cyamunara






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND