Coronavirus: Trump yategetse uruganda rwakoraga imodoka yise urw'‘imburamukoro’ gukora 'Ventilateurs'

.Uru ruganda rwari rusanzwe rukora imodoka yarutegetse ibi nyuma yo kwibasira umuyobozi mukuru warwo Mary Barra, avuga ko ibintu "buri gihe biba ari akavuyo" mu buyobozi bwe bw'urwo ruganda rw'imodoka rufite icyicaro mu mujyi wa Detroit.

Intandaro yo kumunenga ifitanye isano n’amagambo Trump yanditse kuri twiter ku munsi w’ejo avuga ko uruganda rwa GM rwagabanyije umubare wa 'ventilateurs' rwari rwemeye gukora, uva ku 40,000 ugera ku 6,000 kandi ko rwifuje "igiciro cyo hejuru".

Yafashe icyo cyemezo cyo gutegeka GM gukora ibi bikoresho ashingiye ku itegeko ryagiyeho mu gihe cy'intambara yo muri Koreya rizwi nka 'Defense Production Act', riha ububasha perezida bwo gutegeka amakompanyi gukora ibikoresho ku bw'umutekano w'igihugu.

Bwana Trump yavuze ko "GM iri guta igihe" muri ibi bihe hacyenewe kugira igikorwa mu kurokora ubuzima bw'Abanyamerika.

Ibikoresho byo mu buvuzi bituma abarwayi ba Covid-19 bashobora guhumeka, biri gucyenerwa cyane muri iki gihe muri Amerika, ni yo mpamvu hari kwifashishwa na 'ventilateurs' mu kunganira ibikoresho bisanzwe by'ubuvuzi bw'iyo ndwara yibasira ibihaha.

Kugeza ubu muri Amerika haraburwa abarwayi 104,000 banduye coronavirus, bakaba ari bo benshi cyane ku isi, mu gihe muri iki gihugu abagera hafi ku 1,700 imaze kubica.

Mbere, Bwana Trump yari yaravuze ko kwitabaza iryo tegeko ryo mu gihe cy'intambara yo muri Koreya bishobora kutazaba ngombwa, kubera ko amakompanyi ari kwibwiriza agahindura ibyo yari asanzwe akora, mu gufasha kurwanya ikwirakwira rya coronavirus ariko ku munsi w'ejo ku wa gatanu, Bwana Trump yasohoye itangazo agira ati:

"Iyi virusi irihutirwa cyane kuburyo hatakurikizwa uburyo busanzwe..." Uruganda GM ejo ku wa gatanu rwatangaje ko rushobora gukora 'ventilateurs' zigera ku 10,000 ku kwezi, guhera mu kwezi gutaha kwa kane.

Src: BBC