Airtel Rwanda
Kigali

“Queen Sono”: Filime Nyafurika y’uruhererekane igiye kwandika amateka ku Isi

Yanditswe na: Christian Mukama
Taliki:10/03/2020 8:09
0

Film y’uruhererekane yiswe Queen Sono, ni imwe mu ma-films yanditswe, igakinwa ndetse ikanatunganywa n’Abanyafurika bo ubwabo. Ikigira iyi film gukomezwa kuvuga ku ruhando mpuzamahanga ni uko ari yo ya mbere ikozwe n’Abanyafurika isigaye itambutswa ku rubuga rwa Netflix.



Iyi film y’uruhererekana yanditswe na Kagiso Lediga ndetse ikaba inagaragaramo umukinankuru w’ibanze, Queen Sono, Pearl Thusi mu mazina ye nyakuri. Uyu mukinankuru w’ibanze ni umugore w’icyamamare muri sinema akaba kandi azwi cyane kubera umwuga w’ubunyamideri kimwe n’ibiganiro akora ku maradiyo na tereviziyo zo muri Afurika y’Epfo ari na ho ba nyiri iki gikorwa bakomoka. 


Iyi film, kugeza magingo aya iri mu duce duto dutandatu, igaragaza ubuzima bw’umukobwa w’imfubyi uba akora akazi ka maneko. Ikindi gitekerezo nyamukuru ni uko iyi film iduhishurira ko Queen Sono yari umwana w’impirimbanyi yaharaniye ukwishyira-ukizana kw’Abirabura muri Afurika y’Epfo. Mu kigo yakoreraga cy’ubutasi, uyu mukinankuru aza kumenya amwe mu makuru ashyira ahagaragara uko urupfu rw’umubyeyi  we rwagenze dore ko rwanabaye imbarutso y’impinduramatwara. Uyu mukinankuru akazi ke ntikaba karangirira muri Afurika y’Epfo ahubwo kaba kagera mu bihugu byinshi by’ Afurika. Reka tureke gukomeza kuvuga ibiranga iyi film, ahasigaye ni ahanyu. 


Reka twigarukire ku bituma iyi film igiye kwandika amateka. Nk'uko byavuzwe haruguru, iyi ni yo film yanditswe n’Abanyafurika, igatunganywa ndetse ikanakinwa na bo-- “script-to-screen”-- irimo kwerekanwa bwa mbere ku rubuga rwa Netflix. Ubusanzwe uru rubuga rumenyereweho kwerekana films zokorewe mu bihugu bikataje mu bukungu n’ikoranabuhanga nk’Amerika na Koreya y’Epfo. 


Ikindi kintu cyatumye ikundwa cyane ni indirimbo, yiswe “Disco Matanga”, yumvikanamo yakozwe n’itsinda ry’Abanyakenya, Sauti Sol ndetse n’umuririmbyikazi Sho Madjozi wo muri Afurika y’Epfo.  Twasoza twibutsa abantu ko kuri uru rubuga rwa Netflix iyi film iri mu zirebwa na benshi kurusha izindi. Igice cya mbere cyamaze gushyirwa hanze, ahasigaye ni ahanyu!







TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND