Perezida w’ u Bushinwa mu biganiro n’Umuyobozi wa WHO ku buryo bwo kurwanya Coronavirus

Ibi biganiro Dr Tedros Adhanom Ghebreyesus—umuyobozi wa WHO— yagiranye n' abayobozi bakuru mu Bushinwa, byagarutse ku kurebera hamwe iki cyorezo cya Coronavirus (2019-nCoV), ndetse no kwiga ku buryo cyahagarikwa mu maguru mashya.

Kuri ubu, uduce dutandunye mu Bushinwa twafatiwe ingamba z' uburyo bwo kwirinda iki cyorezo bigaragazwa ko hataramenyekana uko cyateye, ndetse n'umuvuduko cyanduriraho. Kugeza magingo aya, harabarwa nibura abagera ku 106 bamaze kwitaba Imana, ndetse n'abarenga 4500 banduye agakoko ka Coronavirus 2019.

Uretse ibihugu by'amahanga biri kugenda byakira abantu bakekwaho kuba bafite iyi virusi yakomotse mu Bushinwa, mu Ntara ya Hubei, agace ka Wuhan, bivugwa ko ariyo ntangiriro y' iki cyorezo.  Mu bafite iyi virusi, abagera ku 2,714 babarizwa muri Hubei. Ubu, aka gace ka Wuhan kakaba gafunze ku buryo ntawinjira cyangwa ngo asohoke.

Amerika ndetse n’ahandi hari gufatwa ingamba zo guhagarika abahagenderera baturutse ku butaka bw’u Bushinwa, mu rwego rwo kurinda isakara ry’iyi virusi.

Coronavirus 2019 (2019-nCoV) imaze kugera he? Imaze kugera muri China, United States, France, Japan, South Korea, Taiwan, Singapore, Thailand, Australia, Nepal, Vietnam, Hong Kong, Macau, Malaysia, Canada, Cambodia, Sir Lanka, ndetse Germany. N’ ubwo iyi virusi imaze kugera mu bihugu byinshi, imibare myinshi y'abafite iyi virusi ndetse n’abapfuye iri mu Bushinwa.

Amakuru dukesha ikinyamakuru Aljazeera agaragaza ko muri Ethiopia hafashwe abantu bane bakekwaho kuba bafite virusi ya Coronavirus 2019. Abo bantu bane bose bakaba bakuwe ku kibuga cy’ indege cya Addis Ababa, baturutse mu mujyi wa Wuhan, Intara ya Hubei, mu Bushinwa—aho coronavirus yaturutse.

Tubibutse ko amakuru y’ iki cyorezo yamenyeshejwe Umuryango Wita ku Buzima ku Isi (WHO), ku itariki 31, Ukuboza, 2019.

Src: aljazeer.com, who.int, cdc.gov, nytimes.com