Airtel Rwanda
Kigali

Umunya- Tanzania Mbwana Ally Samatta yasinye muri Aston Villa yo mu Bwongereza - AMAFOTO

Yanditswe na: SAFARI Garcon
Taliki:21/01/2020 9:38
0

Rutahizamu ukomoka muri Tanzania Mbwana Ally Samatta w’imyaka 27 y’amavuko, yateye ikirenge mu cy’abakinnyi batandukanye bavuka muri Afurika y’Uburasirazuba barimo umunya- Kenya Victor Wanyama, bakina muri Premier League, ubwo yasinyaga amasezerano y’imyaka ine n’igice agiye gukinira Aston Villa avuye muri Genk yo mu Bubiligi.



Mbwana Ally Samatta kapiteni w’ikipe y’igihugu ya Tanzania yasinye amasezerano y’imyaka ine n’igice muri Aston Villa FC, ikipe ibarizwa mu cyiciro cya mbere muri shampiyona y’Abongereza ikunzwe kandi ukirikirwa na benshi ku Isi.

Samatta yageze muri Genk  yo mu Bubiligi mu 2016 akomeza kwitwara neza, aho mu myaka ine yari ayimazemo yakinnye imikino 101, atsinda ibitego 76, anafasha iyi kipe kugerageza kwigaragaza ku ruhando mpuzamahanga mu mikino ya UEFA Europa League.

Samatta yafashije Genk kwegukana ibikombe bibiri bikomeye mu gihugu cy’ububiligi, birimo Belgian Pro League mu mwaka w’imikino 2018–19 ndetse na Belgian Super Cup mu 2019. Ku giti cye nk’umukinnyi Samatta akinira Genk yahembwe urukweto rwa zahabu nk’umukinnyi watsinze ibitego byinshi mu mwaka w’imikino 2018-2019, ndetse anahabwa urukweto rw’umukinnyi mwiza muri shampiyona y’ububiligi ‘Ebony shoe’2019.

Samatta w’imyaka 27 yabaye mu ikipe ya Simba SC (2010-2011), ayikinira imikino 25 atsinda ibitego 13,mbere yo kujya muri TP Mazembe (2011-2016), nayo yayikiniye imikino 103 atsinda ibitego 60  aho yavuye ajya muri Genk yo mu Bubiligi yakiniye imikino 101, atsinda ibitego 76. Umupira w’abato yawukiniye mu ikipe ya African Lyon iri mu cyiciro cya kabiri muri Tanzania.

Samatta yatangiye gukinira ikipe y’igihugu ya Tanzania mu 2011 ari muri Simba SC. Kuri ubu ni kapiteni w’iyi kipe izwi nka Taifa Stars akaba amaze gukina imikino 56 akaba amaze gutsinda ibitego 20.

Samatta yaciye agahigo ko kuba umunya –Tanzania wa mbere ukinnye muri shampiyona ikomeye y’ubwongereza 'English Premier League', uyu musore akaba aje gufasha Aston Villa kuva mu murongo utukura irimo ku rutonde rwa shampiyona dore ko mu mikino 23 imaze gukinwa iri ku mwanya wa 18 n’amanota 22.


Samatta yabanye umunya -Tanzania wa mbere ukinnye muri Premier League


Samatta yatangaje ko yishimiye ko agiye kujya arebwa n'isi yose muri Aston Villa


Samatta yasinye imyaka ine n'igice muri Aston Villa





Tags:




TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND