RFL
Kigali

Ali kiba yatashye umusigiti yubakishije i Dar Es Salaam

Yanditswe na: Janvier Iyamuremye
Taliki:20/01/2020 17:33
0

Umuhanzi w’umunya-Tanzania Ali Saleh Kiba [Ali Kiba] uri mu bakomeye mu karere k’Afurika y’Iburasirazuba, yatashye ku mugaragaro umusigiti yubakishije mu gace ka Tabata mu Mujyi wa Dar Es Salaam.



Ali Kiba yagize izina rikomeye abicyesha indirimbo nka “Chekecha Cheketua”, “Nakshi Mrembo”, “Usineseme” n’izindi. Album ye yise “Cindrella” yaracuruzwe mu buryo bukomeye mu bihugu nka Kenya na Uganda.

Yatashye uyu musigiti mu birori byabaye kuri iki cyumweru tariki 19 Mutarama 2020 ari kumwe n’abo mu muryango we, bamwe mu bayobozi mu idini ya Islam n’abandi.

Nyina wa Ali kiba yabwiye itangazamakuru ko umwana we yiyemeje kubakisha uyu musigiti nyuma yo kubona ko abo mu gace ka Tabata basengera ahantu hato.

Yavuze ko umwana we yatangije ibikorwa byo kubakisha uyu musigiti nyuma y’uko asoje kubakisha inzu ye bwite.

Ati “Ndishimye kuba uyu musigiti wuzuye. Ndashimira buri wese wagize uruhare. Ntabwo navuga ko ari Alikiba gusa ahubwo n’inshuti ze zaritanze kugira iki gikorwa kirangire neza. “Ndabasabira umugisha ku Mana, kandi ndasabira umugisha n’umwana wanjye.”

Ali kiba ntiyigeze amenyesha abafana be iby’iki gikorwa yakoze. Nyina yavuze ko bitanga isura nziza mu gihe umuntu akoze igikorwa cyiza akaba ari nawe utera intambwe yo kubibwira Isi yose.

Ali kiba atashye uyu musigiti nta gihe kinini gishize Diamond bahora bahanganye nawe atanze ifunguzo z’umusigiti yubakishije mu gace avukamo ka Kigoma.

Ni mu birori bikomeye byo ku wa 31 Ukuboza 2019 aho Diamond yatashye umusigiti yubakishije agashyikiriza ifunguzo umuyobozi w’idini ya Islam mu gace ka Kigoma.

Iki gikorwa uyu muhanzi yagikoze yizihiza isabukuru y’imyaka 10 amaze mu muziki.

Yavutse ku wa 29 Ukwakira 1986 yitwa Ali Saleh Kiba ahitamo gukoresha izina rya Ali Kiba mu muziki ndetse akunze no kwiyita KingKiba, King Of Bongo Flava n’andi mazina.

Ni umukinnyi wa filime, umwanditsi w’indirimbo ufite abana batatu yabyaye ku bagore batatu, ubu abana byemewe n’amategeko Amina Khalef.

Ali Kiba washyize imbere injyana ya Afropop na R&B mu bihe bitandukanye yakoranye indirimbo n’abahanzi b’amazina barimo Ommy Dimpoz, Sauti Sol, Yvonne Chaka Chaka n’abandi.

Ali Kiba yatanze ifunguzo z'umusigiti yubakishije mu gace ka Tabata muri Dar Es Salaam

Ali Kiba ni umuhanzi w'umunyabigwi-Aha yerekanaga igihembo cya 'Best African Act' yegukanye muri MTV EMA Awards






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND