Airtel Rwanda
Kigali

Basketball: REG BBC yasubiriye Patriots BBC iyitwara igikombe ku nshuro ya kabiri yikurikiranya

Yanditswe na: SAFARI Garcon
Taliki:14/12/2019 12:52
0

Nyuma y’ibyumweru bibiri REG BBC itsinze Patriots ku mukino wa nyuma w’irushanwa ry’Agaciro ikanayitwara igikombe, iyi kipe yongeye gusubira mukeba wayo Patriots BBC, iyitsindira ku mukino wa nyuma w’irushanwa ribanziriza Shampiyona ‘BK Preseason’, inayitwara igikombe ku kinyuranyo cy’amanota 64-50.



Umukino wa nyuma mu bagabo usoza irushanwa ribanziriza Shampiyona, wahuje amakipe ahora ahanganye mu Rwanda mu mukino wa Basketball, wabaye ku mugoroba wo kuri uyu wa Gatanu, ubera muri Petit Stade i Remera, ukaba wari w’itabiriwe n’abantu batari bake.

Ikipe ya REG BBC yegukanye intsinzi yatangiye umukino igaragaza imbaraga zo kwegukana igikombe dore ko yatsinze agace ka mbere amanota 17 kuri 11 ya Patriots BBC.

Agace ka kabiri amakipe yombi nta byinshi yerekanyemo kuko karangiye buri kipe itsinzemo amanota 7. Agace ka gatatu amakipe yombi yerekanye uguhangana asanzwe yerekana.

Agace ka kane amakipe yombi yakoresheje abakinnyi batsinda cyane maze batsindana amanota 22 kuri buri kipe. Umukino warangiye REG BBC yegukanye igikombe n’amanota 64 kuri 50 ya Patriots BBC.

Mukengerwa Benjamin ukinira REG BBC watsinze amanota 21, ni we watsinze amanota menshi muri uyu mukino. Yakurikiwe na Ndizeye Dieudonné ukinira Patriots BBC watsinze amanota 16.

Ikipe ya Patriots yakoze impinduka nyinshi  mu kibuga b’isa n’aho umutoza yashakaga kumenya neza abakinnyi 12 azakoresha mu mikino ya Basketball Africa, byanatumye REG iyitsinda amanota 18 ku 10 ku buryo buyoroheye.

Kugarira neza ndetse no guhererekanya neza mu kibuga biri mu byafashije REG BBC gutwara igikombe kibanziriza shampiyona nk’uko byatangajwe n’umutoza  wungirije w’iyi kipe Mwiseneza Maxime.

Ikipe ya REG BBC yegukanye igikombe cya kabiri yikurikiranyije nyuma yo kwegukana Agaciro Basketball Tournament 2019.


REG BBC yegukanye igikombe kibanziriza shampiyona ihigitse mukeba 


Patriots itsindiwe na REG ku mukino wa nyuma inshuro ebyiri mu gihe kitarenze ibyumweru bibiri


Wari umukino urimo guhangana ku mpande zombi



REG BBC bishimira igikombe kibanziriza Shampiyona begukanye





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND