Mu gikorwa ngarukamwaka cyo gushimira Imana mu bikorwa (Thanksgiving) gitegurwa n’umuryango Women Foundation Ministries cyabereye i Kinyinya kuri uyu wa Gatanu, uyu muryango wageneye ibikoresho bitandukanye abana bafite imirire mibi bo muri Buhunde ya 2, unatangira mituweli abantu ibihumbi bitatu batishoboye.
Kuri uyu wa Gatanu tariki 29 Ugushyingo
2019 saa tatu za mu gitondo, Umuryango Women Foundation Ministries werekeje mu
murenge wa Kinyinya, mu kagari ka Kagugu muri Kabuhunde ya 2
mu Karere ka Gasabo mu gikorwa cyo gufasha abana bafite ikibazo
cy’imirire mibi bari mu mutuku no gufasha ababyeyi b’abo bana, bakaba bahawe
igikoni kigezweho kizabafasha, hiyongeraho n’igikorwa cyo kubakira
akarima k’igikoni iyo miryango yagenewe, hanatangirwa mituweli abantu
ibihumbi bitatu bo muri Kinyinya.
Igikorwa nyamukuru cyakozwe ni ugufasha abatishoboye mu bijyanye n’imirire mibi aho hari hanitwajwe n'ibindi bikoresho bitandukanye bikenerwa mu muryango harimo ibikoresho by’isuku, imyenda n'ibindi bikenerwa mu buzima bwa buri munsi. Uretse igikoni bagenewe, iyi miryango yanahawe ifu y'igikoma irimo intungamubiri zose ndetse n'inkoko zizabafasha kurandura burundu imirire mibi. Ni igikorwa cyitabiriwe n’Umunyamabanga Nshingwabikorwa w’umurenge wa Kinyinya.
Kuva muri 2007 Women Foundation Ministries (WFM) yari isanzwe ikora
igikorwa cyo kugaburira abana indyo yuzuye barwariye mu bitaro bya CHUK
buri wa Kane (Rimwe mu cyumweru), icyo gikorwa cyahagaze muri 2017 ubwo WFM
yatangije Center yita ku bana bafite imirire mibi bari mu mutuku mu murenge wa Kinyinya i Kagugu muri Kabuhunde ya 2 kuko yasanze nk’abantu babarizwa mu iyobokamana
bagomba kugira uruhare runini kandi rukomeye mu guhyigikira gahunda za leta mu
buryo bwose.
Iyo Center ikaba igiye kumara imyaka 2
ikora kandi neza. Kuri iyi nshuro ya 13 ya Thanksgiving, WFM ikaba yatangije gahunda
yo guhugura ababyeyi batishoboye bo muri ako gace ku bijyanye n’imirire myiza n’indyo
yuzuye mu miryango yabo kugira ngo bakomeze kubaho ubuzima bw’imirire myiza mu
bushobozi bafite kandi mu buryo burambye.
Imwe mu ntego ya WFM kuri iyi nshuro ya
13 hakorwa igikorwa cya Thanksgiving ni uko ikibazo cy’imirire mibi ku bana babarizwa
muri Kagugu, Kabuhunde ya 2 kiranduka burundu hakabaho ubuzima buzira indwara Imana
igahabwa icyubahiro ku bw’abantu bemera gukoreshwa na yo kugira ngo n’abandi babeho
neza.
Ababyeyi bari bafite abana
bagaragarwaho imirire mibi bavuga ko uyu muryango washinze iyi Center wakoze
cyane kuko abana babo bongeye kugarura ubuzima, bakongera kuba abantu dore ko
bari bagiye kubacika, bakaba banavuga ko igikoni bagenewe cyizabafasha cyane
gushyira mu ngiro ibyo bazaba bahuguwemo ndetse n’inkoko bahawe zikazabafasha
kurandura burundu imirire mibi mu murenge wabo.
Apostle
Alice Mignonne Kabera umuyobozi mukuru wa WFM yishimira intambwe iki gikorwa gitera
buri mwaka, akanashishikariza abantu gusangira bicye bafite kuko ari byo
bizabahesha ijuru.
Yagize ati” Igikorwa kimaze imyaka 13,
kikaba gikorwa buri mwaka, kandi tubona tugenda tuva mu bwiza tujya mu bundi,
icyo nabwira abantu baba bari hafi cyangwa bari kure, buri umwe yakora imirimo myiza
akayihuza no gusenga kuko imirimo ye izibukwa kandi ariyo izamufungurira
amarembo y’ijuru”.
Women Foundation Ministries ni umuryango mpuzamahanga udaharanira inyungu, ushingiye ku kwizera ukaba ugamije kubaka umuryango binyuze mu mugore. WFM yatangijwena Apostle Alice Mignonne Kabera, akaba ari nawe uyibereye umuyobozi mukuru ikaba ifite icyicaro ku Kimihurura.
Mu bikorwa ngarukamwaka Women
Foundation Ministries igira harimo igikorwa cyo gushima Imana mu bikorwa
(Thanksgiving) cyavukiye mu iyerekwa ryahawe umushumba mukuru wa WFM binyuze mu
Ijambo ry’Imana dusanga mu gitabo cyo Deutronomy 8 :12-14 "Numara
kurya ugahaga, ukamara kubaka amazu meza ukayabamo, inka zawe n’imikumbi yawe
n’ifeza zawe n’izahabu zawe, nibyo ufite byose bikaba bigwiriye, uzarinde
umutima wawe we kwishyira hejuru, ngo wibagirwe Uwiteka Imana yawe yagukuye mu
gihugu cya Egiputa, mu nzu y’uburetwa"
WFM yageneye abana bafite imirire mibi ifu y'igikoma
Imiryango y'aba bana bafite ibibazo ikaba yagenewe n'ibindi bikoresho bitandukanye
Iyi miryango yahawe inkoko mu rwego rwo kurandura burundu imirire mibi
Ababyeyi bafite abana bari bafite ibibazo by'imirire mibi ariko bakaba barakize babikesha iyi center bashyiriweho
Apostle Kabera Alice Mignonne umuyobozi wa WFM
Umunyamabanga Nshingwabikorwa w'umurenge wa Kinyinya Umuhoza yari yitabiriye iki gikorwa
Mbere y'ibindi byose babanje kuririmbira Imana no kumva ijambo ryayo
Ababyeyi batambira Imana
Abakirisito bose bacinye akadiho bashima Imana kuba yabashoboje kugera aha hantu
Hateguwe ifunguro rihabwa abana baba muri iyi center yita ku bana bafite ibibazo by'imirire
Apostle Mignonne Kabera agaburira abana bafite ibibazo by'imirire mibi
Abana bahawe ifunguro
Abagize WFM bakoze igikorwa cyo gushima Imana mu bikorwa
Umwanditsi – SAFARI Garcon –
inyarwanda.com
TANGA IGITECYEREZO