Miliyoni 2 Rwf zizahatanirwa n’amakipe azitabira irushanwa ry’Agaciro Basketball Tournament 2019

Ni irushanwa riteganyijwe gutangira tariki ya 21 kugera tariki ya 29 Ugushyingo 2019 rikaba  ryarateguwe n’Ikigega Agaciro Development Funds, n’ishyirahamwe ry’umukino wa Basketball mu Rwanda. Amakipe 8 niyo azitabira mu cyiciro cy’abagabo n’abagore ndetse n’amakipe 6 y’abakiri bato agabanyije mu byiciro bibiri.

Amakipe azitabira iri rushanwa ni ayasoje mu myanya ine ya mbere mu mwaka ushize w’imikino muri shampiyona ya Basketball mu Rwanda.

Mu bagabo hazitabira Patriots BBC, REG BBC, APR Men BBC na Espoir BBC.

Mu Bagore hazitabira APR Ladies BBC, The Hoops BBC, RP-IPRC Huye n’ Ubumwe BBC.

Mu bakiri bato hazitabira Elite BBC, Rafiki Kids, VJN Rubavu, Shooting Touch, Gikondo Boys na The Hoops.

Ni irushanwa rizaterwa inkunga n’ikigega Agaciro Development Fund, bavuga ko bishimiye amahirwe babonye yo gukorana na FERWABA kugirango basobanurire abanyarwanda akamaro ko kwizigama bagira uruhare  mu kubaka igihugu cyabibarutse batera inkunga ikigega Agaciro Development Fund.

Mugwiza Desire uyobora FERWABA  yasobanuye impamvu bahisemo amakipe ane gusa mu byiciro byombi kandi iri rushanwa ryakabaye rifasha amakipe kwitegura shampiyona igiye gutangira.

Yagize ati” Twahisemo amakipe ane yabaye ayambere muri shampiyona y’umwaka ushize mu rwego rwo kuyaha agaciro, kugira ngo ubutaha amakipe yose ajye aharanira kurangiza muri ane ya mbere kuko bitanga amahirwe menshi”.

Dr. Jack Kayonga uhagarariye ikigega Agaciro Development Fund avuga ko ubu mu busanzwe bateraga inkunga umupira w’amaguru, ariko kuri ubu  batangiye gukorana na FERWABA batera inkunga iri rushanwa bifuza ko cyaba igikorwa gihoraho kandi ko bifuza no kuzajya mu yindi mikino itandukanye kugira ngo binyuze mu mikino bamenyekanishe kandi banagaragarize abanyarwanda icyo ikigega Agaciro gikomeje kugeza ku banyarwanda ariko banakangurirwa kwizigama, banazigamira igihugu batanga umusanzu mu kigega Agaciro Development Fund  buri wese mu bushobozi bwe kandi bimuvuye ku mutima.

Ikipe ya mbere mu bagabo no mu bagore izahembwa igikombe izahembwa igikombe na Miliyoni ebyiri z’amafaranga y’u Rwanda (2,000,000 Rwf), mu gihe ikipe ya kabiri mu byiciro byombi izahembwa ibihumbi 500,000Rwf, ikipe ya mbere mu bakiri bato (U17) izahembwa igikombe ndetse n’inkweto.

Hazahembwa umukinnyi witwaye neza mu irushanwa (MVP) mu byiciro byombi mu bakuru ndetse no mu bakiri bato (U17).

Igiciro cyo kwinjira kuri iyi mikino kibereye buri munyarwanda wese kuko ari ibisanzwe, mu mikino izaba ku wa gatanu no ku wagatandatu ikabera muri Petit stade, ahasanzwe ni igihumbi ( 1000Rwf) mu gihe muri VIP ari ibihumbi bitatu (3000 Rwf). Irushanwa risozwa ku mukino izabera muri Kigali Arena kwinjira ni 10,000Rwf muri VVIP, 3000Rwf muri VIP ndetse n’amafaranga 1000Rwf ahasigaye hose. Amafarang azaboneka kuri iyo mikino azashyirwa mu kigega Agaciro mu rwego rwo gukomeza gushyigikira intego igihugu cyihaye.

Uko amakipe azahura k’umunsi wa mbere – ku wa Gatanu tariki 22 Ugushyingo 2019 – Petit Stade

4Pm Elite vs Rafiki Kids                                                                       

6Pm APR Ladies vs Ubumwe

8Pm Patriots BBC vs Espoir BBC

Irushanwa ry'uyu mwaka rizaterwa inkunga n'ikigega Agaciro

President wa FERWABA Bwana Mugwiza Desire

Umuyobozi w'ikigega Agaciro Dr. Jack Kayonga avuga ko ari amahirwe babonye yo gukorana na FERWABA

Dr. Kayonga avuga ko ari urubuga rwo gushishikariza abanyarwanda kuzigama bazigamira igihugu batanga umusanzu mu kigega Agaciro

Itangazamakuru ryari ryitabiriye iki kiganiro

Clarisse Uwimana ukorera Contact TV

Nsengiyumva Sidick ukorera TV10

Dr. Jack Kayonga uyobora ikigega Agaciro na Mugwiza Desire uyobora FERWABA

Umwanditsi – SAFARI Garcon - inyarwanda.com