RFL
Kigali

VIDEO: Umuyapani ucuranga gitari Quagerou, ari mu Rwanda afata amajwi y'udukoko azakoresha kuri alubumu ye ya 21

Yanditswe na: Muvunyi Arsene
Taliki:15/11/2019 19:10
0


Quagerou Imazawa Umuyapani ufite ubuhanga mu gucuranga gitari ya Bass ari mu Rwanda aho avuga yaje gufata amajwi azifashisha mu gutunganya alubumu ye ya 21.



Qugero Imazawa ni umuyapani wigisha umuziki muri Kaminuza ya Shikoku, akandika indirimbo ndetse akaba amaze imyaka igera kuri 36 acuranga gitari ya bass. Amaze kuzenguruka ibihugu 36 byo ku Isi agenda acuranga mu bitaramo bitandukanye.

Kuri ubu ari mu Rwanda, mu kiganiro yagiranye na INYARWANDA yavuze ko agenzwa no gufata amajwi azifashisha muri alubumu ye 21 ari gutunganya, ayo majwi akaba ari ayo afatiraha ahantu hatandukanye  bitewe n’ijwi yifuza [Field recording]

Quagerou Imazawa yavuze ko mu majwi yifuza gufata mu Rwanda harimo ay’udukokoko, amajwi y’abantu, n’ibindi maze akazayahuza n’aya gitari agakora injyana zigize alubumu ye ya 21 ari gutunganya.

Avuga ko impamvu yatumye yiyemeza kwambuka inyanjya akaza mu Rwanda ari isuku n’umutekano uri muri iki gihugu ariko by’umwihariko ngo yashakaga kumenyekanisha amajwi yo muri Afurika ku Isi hose.

Ati “kuva mu bwana bwanjye nakunze imiziki gakondo yo ku Isi hose ubwo numvaga imiziki yo muri Afurika y’Uburasirazuba nashatse kwinjiramo  neza  kugira ngo menyekanishe aya majwi ku Isi hose nyavanze n’umuziki w’umwimerere.”

N’ubwo nta byinshi azi byerekeye umuziki gakondo w’u Rwanda avuga ko yifuza kwiga byinshi birimo n’igikoresho cy’inanga yakunze.

Ati “ Ntacyo mbiziho ariko ndashaka kubimenya. Nize ibintu bike ku nanga nakunze uburyo ivuga, nagerageje kuyicuranga ubwanjye, ngerageza no gucuranga gitari nkoresheje tekiniki z’inanga, ndashaka kwiga byinshi ku muziki gakondo w’abanyarwanda.”

Quagero avuga ko inanga ifite aho ihuriye na bimwe mu mu bikoresho byo mu muco w’iwabo ari nayo mpamvu yifuza kuyimenyaho byinshi. 


Quagerou Imazawa ni umuhanga mu gucuranga gitari ya bass

REBA IKIGANIRO KIRAMBUYE TWAGIRANYE NA QUAGEROU IMAZAWA







TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND