MTN
Kigali

Urubyiruko rwa Bethesda Holy Church rwateguye igiterane 'BHC Youth Week' kigamije gusenya inzitizi z'ububyutse

Yanditswe na: Mupende Gedeon Ndayishimiye
Taliki:14/11/2019 14:42
0

BHC Youth week ni icyumweru ngarukamwaka itorero Bethesda holy church rigenera urubyiruko mu rwego rwo kugaragaza ubushobozi bwabo nk'itorero ry'ejo hazaza. Igiterane cyo muri uyu mwaka kizaba tariki 19-22 Ugushyingo 2019.



Muri BHC Youth Week hakorwamo ibikorwa bitandukanye ariko byibanda mu kwiga ijambo ry’Imana aho batumira inzobere mu by’ijambo ry’Imana. Kuri iyi nshuro bazanye umwihariko wabo aho uhereye ku isanganyamatsiko igira iti "Inzitizi z'ububyutse (The barriers of Revival)"

Tuganira n’umuyobozi w'urubyiruko rwa Bethesda Holy Church, Ev Oliver Rwandenzi twamubajije impamvu bahisemo iyi nsanganyamatsiko adusubiza agira ati "Ubundi urubyiruko rwacu dufite iyerekwa ryo gutegura urubyiruko ruzana impinduka n'ububyutse muri sosiyete ndetse no mu itorero kuko tuzi ko ububyutse ari igisubizo cy'ibibazo byinshi biri hano ku isi. Rero kuri iyi nshuro tuzaba turi kuganira ku nzitizi cyangwa imbogamizi zituma ububyutse butaba.

Mu giterane cy'uyu mwaka batumiye abakozi b'Imana b'inzobere mu ijambo ry'Imana bazabafasha gusesengura inzitizi z'ububyutse, abo akaba ari: Dr.Rev.Pst. Antoine RUTAYISIRE, Apostle Sosthene SERUKIZA na Pst Habyarimana Desire. Si ibyo gusa kuko banatumiye n'abaririmbyi bazabafasha kuramya no guhimbaza Imana ari bo: Healing worship team ndetse na El Shadai choir.

Izi nyigisho zizamara iminsi 4 kuva taliki ya 19 kugeza taliki ya 22 Ugushyingo 2019 aho bazajya batangira saa kumi n'imwe kugeza sa mbiri z'umugoroba (17h_20h) ku rusengero rwa Bethesda Holy Church ku Gisozi.

Nk'uko bitangazwa n’umuyobozi w'urubyiruko Ev. Olivier Rwandenzi arahamya ko uzajya muri iki giterane azakuramo ibintu bitatu by'ingenzi. Ati "Icya mbere ni uko ubugingo bwe buzahahembukira. Icya kabiri azaze yiteguye kwakira icyerekezo gishya cy'uburyo yahindura isi ikaba nziza kuruta uko yayisanze.

Icya gatatu azaze yiteguye kwemerera Imana ikamuhindura igikoresho ikoresha mu bubyutse kuko mu bubyutse Imana ikoresha abantu, muri iyi seminar tuzahigira amahame ava mu ijambo ry'Imana adushoboza kuba umusemburo mwiza w'impinduka n'ububyutse muri sosiyete ndetse no mu Itorero ry'Imana."


Ev Olivier Rwandenzi Umuyobozi w'urubyiruko rwa Bethesda Holy Church








Inyarwanda Art studio
Inyarwanda BACKGROUND