Rabagirana Worship Festival 2019 yahembuye imitima ya benshi, El Shaddai na Anointed Band bakurirwa ingofero-AMAFOTO

Rabagirana Worship Festival 2019 yayobowe na Mc Becky Hillary umushyushyarugamba mwiza igisata cy'Iyobokamana gifite. Iki gitaramo cyatangiye saa munani z'amanywa gisozwa saa mbiri z'ijoro. Salle yari yakubise yuzuye na cyane ko kwinjira byari ubuntu. 

Abitabiriye iri serukiramuco baramije Imana hamwe n'abaramyi batandukanye barimo Simon Kabera, Danny Mutabazi, Papy Clever, Sam Rwibasira, Anointed Band, C Patrick, Esther mushiki wa Deo Munyakazi, Alarm Ministries, Healing Worship Team, New Melody, Korali El Shaddai na Kumbaya Group.

Iki gitaramo kitabiriwe bikomeye gihembura imitima ya benshi

Rabagirana Worship Festival 2019 yaranzwe n'udushya dutandukanye ugereranije n'iyabaye umwaka ushize. Agashya ka mbere utarenza ingohe katamenyerewe mu muziki wa Gospel ni uko buri wese witabiriye iri serukiramuco yahawe amata y'inka atunganywa n'uruganda rwa Mukamira. 

Ni ibintu wabonaga byashimishije benshi aho waramyaga Imana, ukananyuzamo ukica icyaka. Hitimana Alain (Freeman) wari uhagarariye uru ruganda muri iki gitaramo yahaye ikaze buri wese kuri Mukamira ati "Munywe amata, amata ni ubuzima."

Byari ibihe bidasanzwe byo kuramya Imana

Akandi gashya kabaye ni aho El Shaddai choir yaririmbye neza 'Musique classique' ibintu bizwi nk'umwihariko w'amakorali yo muri Kiliziya Gatolika. Mu majwi yabo y'umwimerere, El Shaddai batunguranye baririmba 'Musique classique' bishimisha buri wese wari uri muri iki gitaramo. 

El Shaddai yigaragaje nka korali ikomeye yihariye mu dushya

Si ibyo gusa ahubwo aba baririmbyi bageze ku ndirimbo yabo 'Cikamo' ikunzwe n'abatari bacye, ibintu bihindura isura dore ko bayiririmbye basimbuka mu buryo bwizihiye benshi. Sam Rwibasira n'undi musore witwa C Patrick nabo bigaragaje nk'abaririmbyi b'abahanga cyane batanga icyizere cy'ejo heza mu muziki wa Gospel.

Anointed Band, itsinda ry'abali n'abategarugori ryashinzwe n'umuhanzikazi Gisele Precious ryatunguranye ricuranga muri iki gitaramo dore ko ritigeze ryamamazwa mu itangazamakuru ko rizaba rihari. Aba bakobwa bagaragaje ko ari abanyempano ikomeye umuziki w'u Rwanda wungutse. 

Gisele Precious umuhanzikazi mwiza u Rwanda rufite mu minsi iri imbere

Ni ibintu byizihiye benshi kubona abakobwa n'abagore barimo kwicurangira ibicurangisho bisanzwe bicurangwa n'igitsinagabo. Gisele Precious yabanje gusaba abantu bose bari bari kuri stage kuyivaho, hagasigaraho gusa ab'igitsinagore.

Anointed Band ikuriwe n'umuhanzikazi Gisele Precious

Gisele Precious ukunzwe mu ndirimbo 'Imbaraga', yagize ati "Murabona ko turi Anointed si byo?" Abandi bati Yego!. Ati "Ndashaka ko kuri stage hasigaraho gusa abakobwa n'abamama". Aba bakobwa ni bo bicurangiye kuva bageze kuri stage kugeza bayivuyeho. Umukobwa umwe yacurangaga ingoma za kizungu, abandi babiri bacuranga piano, abandi babiri baguranga gitari umwe kuri solo undi kuri Bass. Abari muri iki gitaramo basabwe kubyaza umusaruro iyi Band.

Peace Nicodem (hagati) na Producer Karenzo (iburyo)

Ev Dr Byiringiro Samuel ni we wabwirije muri iki gitaramo. Yikije ku mpano n'imbuto (Character Vs Charisma) abisanisha n'insanganyamatsiko y'iri serukiramo iri mu Abafilipi 4:17 hagira hati "Nyamara si impano nshaka ahubwo nshaka ko imbuto zongerwa kuri mwe". 

Yasabye buri wese ufite impano kongeraho imbuto kuko ari zo zizatuma baguma ku gasongero k'ubutsinzi. Yatanze urugero kuri Samusoni wari ufite impano itangaje (Charisma) ariko akaza kuba nk'abandi bose kubera ko 'Character' ye yayitakaje ubwo yameneraga Derira ibanga ry'aho akomora imbaraga bakamunogoramo amaso.

Ntibazibagirwa ibihe byiza bagiriye muri Rabagirana Worship Festival 2019

Nzahoyankuye Nicodem uyobora Christian Communication Ministry itegura Rabagirana Worship Festival yashimiye buri wese wagize uruhare mu migendekere myiza y'iki gitaramo. Yashimiye byimazeyo abamuteye inkunga y'ibifatika barimo Rabagirana Ministries, Prime Insurance, Uruganda rwa Mukamira rwahaye amata buri wese witabiriye iki gitaramo ndetse anashimira n'itangazamakuru. Hanabayeho gukata umutsima wateguwe Petersbakers mu rwego rwo kwizihiza imyaka ibiri iri serukiramuco rimaze. 

Peace Nicodem utegura Rabagirana Worship Festival

Healing Worship Team bageze kuri stage mbere y'uko Alarm Ministries isoza iki gitaramo, babanza kunenga abakozi b'Imana bacuruza inzoga bati 'Ikizira cyinjiye Ahera', bahise baririmbira Imana benshi bahembuka imitima

Bamwe mu bacuranzi bagize itsinda Anointed Band

El Shaddai choir yakoreye agashya muri iki gitaramo

Freeman wari uhagarariye uruganda rwa Mukamira yagiye kuri stage afite amata

Alarm Ministries gusirimba ni ibintu byabo

Atitaye ku nkuru ari bukore kandi iri bukenere amafoto, gufotora yabiretse abanza kuramya Imana

Simon Kabera yahesheje umugisha abitabiriye iki gitaramo

Arsene Tuyi na Rachel Rwibasira bari baje 'kurabagirana'

Mama Kenzo n'umuhungu we Kenzo bakuye umunezero muri iki gitaramo

Arsene Tuyi yatunguwe asabwa na Gisele Precious gusanga kuri stage Anointed Band bakaririmbana 'Fanda Nayo' ya Alka Mbumba ikunzwe cyane muri ERC Masoro

Bakase umutsima mu kwizihiza imyaka ibiri iri serukiramuco rimaze

Kumbaya Group bakinnye ikinamico ishushanya amahoro ari muri Yesu Kristo

Umuramyi C Patrick warezwe na Bishop Amon aratanga icyizere cy'ejo heza mu muziki wa Gospel

Sam Rwibasira umuramyi w'umunyempano Bethesda Holy church ikwiriye kwitaho by'umwihariko

Sam Rwibasira n'abaririmbyi be bagororotse imihogo

Abasore bo muri Daymakers bakurikiranye iki gitaramo 'nta no guhumbya' 

Umunyamakuru Juliet Tumusiime yizihiwe

Clarisse Karasira umukobwa w'Imana n'igihugu yafashijwe cyane

Steven Karasira yatumiye abantu mu gitaramo cya Radio Umucyo kizaba ku Cyumweru gitaha muri Dove Hotel

Patient Bizimana, Deo Munyakazi na C John bari baje 'kurabagirana'

Bamwe mu bakobwa bakiraga abantu bitabiriye iki gitaramo

Maneri, Fidele na Charles bamwe mu bagize uruhare mu migendekere myiza y'iki gitaramo

Ifoto y'urwibutso y'abafashije Peace Nicodem gutegura iri serukiramuco

AMAFOTO: Lewis Ihorindeba & Moses Niyonzima