Inyarwanda art Studio
Kigali

Meddy, Wizkid, Diamond n'abandi bazaririmba muri Wasafi Festival 2019

Yanditswe na: Janvier Iyamuremye
Taliki:5/11/2019 19:02
0

Umuhanzi Ngabo Medard wamamaye mu muziki ku izina rya Meddy, ukorera muzika muri Leta Zunze Ubumwe za Amerika, yashyizwe ku rutonde rw’abahanzi bazaririmba mu bitaramo bya Wasafi Festival 2019 bitegurwa na ‘Label’ ya Wasafi y’umuhanzi Diamond Platnumz.



Kuri konti ya instagram ya Wasafi Tv, kuri uyu wa 05 Ugushyingo 2019 banditse bavuga bati “Umuhanzi w’umunyarwanda wakunzwe mu ndirimbo ‘Slowly’ no mu njyana ya RnB, Meddy azaririmba mu gitaramo cya ‘Wasafi Festival 2019’.

Wasafi Festival izaba ku wa 09 Ugushyingo 2019 ku kibuga cya Kijitonyama mu Mujyi wa Dar es Salaam. Ni mu gihe Diamond washyize imbere injyana ya Bongo Flava, yamaze gutangaza ko 20% y’amafaranga azava muri ibi bitaramo azayatanga mu bikorwa byo kuvuza abana bafite ikibazo cy’umutima babarizwa mu kigo Jakaya Kikwete Cardiac Institution.

Diamond yanateguje ko azakora igitaramo cyo ku rwego rwo hejuru. Mu kiganiro yagiranye na Wasafi Tv, Diamond yavuze ko umuhanzi w’umunya-Nigeria Ayodeji Ibrahim Balogum uzwi mu muziki ku izina rya Wizkid nawe azaririmba muri Wasafi Festival.

Harmonize yari umwe mu bahanzi bagombaga kuririmba muri ibi bitaramo. Mu kiganiro n’itangazamakuru, Diamond yavuze ko Harmonize atabonetse muri ibi bitaramo bitewe n’uko kuwa 09 Ugushyingo 2019 azaba afite ahandi azaririmba mu gitaramo.

Ali Kiba nawe yagombaga kuririmba muri iki gitaramo, avuga ko atamenyeshwejwe kandi ko atiteguye. Abandi bahanzi bazaririmba ni Ruby, Country Boy, Tiwa Savage, Young Killer, Dulla Makabila, DJ Ommy Crazy, Lava Lava, Mboso, Queen Darleen n'abandi.

Ibitaramo bya Wasafi Festival byatangijwe mu mwaka wa 2018 bibera mu Mujyi wa Mambosa, Nairobi n’ahandi.

Diamond aheruka i Kigali mu gitaramo yahakoreye cy'amateka

Ali Kiba na Harmonize bagombaga kuririmba muri iki gitaramo ariko ntibyakunda

Diamond avuga ko ku munsi Wasafi Festival izaberaho, Harmonize afite ikindi gitaramo agomba kuririmbamo

Meddy uzaririmba mu gitaramio cya Wafi Festival amaze iminsi muri Sychelles









Inyarwanda BACKGROUND