Wari uzi ko hari Bacterie nziza ukwiye gufata ku munsi ?

Umuntu muzima agomba kuba afite bagiteri nziza buri gihe zigera kuri miliyari ibihumbi ijana! Izi bagiteri ziba mu kanwa, ku ruhu, mu matembabuzi, mu mvubura zitandukanye, muri nyababyeyi, mu gitsina, mu bihaha, mu macandwe, mu rurenda rwo mu mazuru no mu maso, ndetse no mu nzira y’urwungano ngogozi.

Akamaro k’izi bagiteri nziza ku mubiri, ni ugufasha kurinda ibibazo bimwe na bimwe harimo nko kuzana uduheri mu maso, allergies zitandukanye n’uburwayi butandukanye bw’igifu. Zifasha umubiri nk’abasirikare bashinzwe kurwanya bagiteri mbi, zitera indwara.

Ubushakashatsi bwerekana ko hari ubwoko bw’ibiribwa buba burimo bagiteri nziza nzima, zizwi nka probiotics, ziboneka cyane cyane mu biribwa byasembuwe. Aha rero reka turebere hamwe bacterie 10 nziza mu mubiri wawe.

1.Lactobacillus Acidophilus:“lakitobasilusi asidofilusi”, ubu bwoko bwa bagiteri ni ingenzi cyane kuko zigabanya uburibwe bwo mu nda no kuba wakumva mu nda byigaragura (ibizwi cyane nk’inzoka zivuga). Ikindi zifasha kurinda ubudahangarwa bw’urwungano ngogozi.

2.Lactobacillus Casei: Zigabanya ibimenyetso byo gucibwamo ndetse zigatuma bagiteri zifitiye akamaro umubiri zikura neza.

3.Lactobacillus Plantarum: Ubu bwoko bwa bagiteri, bugabanya ibyago byo kurwara indwara z'umutima, cyane cyane mu banywi b’itabi.

4.Lactobacillus Salivarius: Izi zirinda icyo twakita nk’imipaka y’amara kuba yakwangirika mu gihe cy’igogora ndetse ikagabanya guhumeka umwuka uhumura nabi.

5.Lactobacillus Brevis: Izi zirinda indwara y’ishinya ibyimba

6.Lactobacillus Rhamnosus: Izi bagiteri zirinda uruhu gufuruta

7.Bifidobacterium Bifidum: Zirinda kubyimbirwa mu mara manini

8.Bifidobacterium Lactis: Zituma umubiri ugira urugero rukwiye rwa bagiteri mu gifu no mu mara cyane cyane nyuma yo gukoresha antibiyotike (imiti yica bagiteri).

9.Bifidobacterium Longum: Izi zifasha mu kuvanaho ibimenyetso bijyana no kutihanganira gluten (ibi bikunze kuba ku bantu barya ibinyampeke bakagira ikibazo, nk’umuceri, ingano cg ibindi birimo ifarini)

10.Streptococcus Thermophilus: Zifatanyije n’izindi bagiteri twabonye, zigabanya ibyago byongera kuba warwara indwara z’umutima.

Ibiribwa wasangamo bacterie nziza ni ibi bikurikira:

Izi bagiteri nziza tumaze kuvuga, ziboneka mu byo kurya cyangwa kunywa bitandukanye. Aho ziboneka cyane ni mu mata y’ikivuguto, yogurt, gusa hari n’ahandi iboneka nk'amavuta y'inka cyangwa fromage, n’ibindi biryo bisembuye nk’imyumbati isembuye.

Src: healthline.com