RFL
Kigali

Uwari Minisitiri w'ubuzima wa Congo yatawe muri yombi

Yanditswe na: Liliane Kaliza
Taliki:15/09/2019 14:31
0


Polisi yo muri Repubulika Iharanira Demokarasi ya Congo yataye muri yombi uwahoze ari Minisitiri w'ubuzima ushinjwa gucunga nabi amafaranga agenewe kurwanya icyorezo cya Ebola.



Dr Oly Ilunga yeguye kuri uwo mwanya mu kwezi kwa karindwi uyu mwaka nyuma yo kwamburwa inshingano zo kuyobora ibikorwa byo kurwanya Ebola.

Ejo ku wa Gatandatu, Polisi yavuze ko yamutaye muri yombi imaze kubona amakuru y'uko yashakaga guhunga ubucamanza akava no mu gihugu.

Ahakana ko hari ikibi yakoze. Mu ibaruwa y'ubwegure bwe, Dr Ilunga yanenze yahunda y'ishami ry'umuryango w'abibumbye ryita ku buzima ku isi (OMS) yo gukoresha urukingo rutarahabwa uruhushya rwo gukoreshwa rwa Ebola.

Icyo gihe, urukingo rwari ruriho ntirwabonekaga mu ngano ihagije ndetse impuguke mu buzima zavugaga ko urundi rukingo, rutari rwakageragejwe ku bantu benshi ku isi, rukwiye gukoreshwa.

Dr Ilunga yavuze ko urwo rukingo rwa mbere ari rwo rwonyine igerageza ryagaragaje ko rutanga umusaruro.

Yananenze icyemezo cyo kumuvana ku buyobozi bw'itsinda ryo guhangana na Ebola, agasimbuzwa akanama avuga ko kari karivanze mu kazi ke.

Abaterankunga bo mu mahanga bamaze gutanga arenga miliyoni 150 z'amadolari y'Amerika yo kurwanya Ebola muri Congo aho imaze guhitana abarenga 2,000 guhera mu kwezi kwa munani mu 2018.

Ni ku nshuro ya 10 Ebola yadutse muri Congo. Yahagaragaye bwa mbere mu mwaka wa 1976. Iyi Ebola yo muri Congo ni iya kabiri ikaze ibayeho mu mateka y'isi, nyuma y'iyibasiye ibice bimwe byo mu Burengerazuba bw'Afurika mu mwaka wa 2014 kugera mu wa 2016, yahitanye abarenga 11,000.

Src: BBC 






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND