Ikinyamakuru cyo muri Turukiya cyatangaje amakuru mashya ajyanye n'amajwi bivugwa ko yumvikanisha ibihe bya nyuma by'umunyamakuru Jamal Khashoggi wishwe wo muri Arabie Saoudite.
Uyu
munyamakuru wanengaga bikomeye leta ya Arabie Saoudite yiciwe mu biro
by'uhagarariye icyo gihugu muri Turukiya biri mu mujyi wa Istanbul mu kwezi kwa
cumi k'umwaka ushize.
Ikinyamakuru
Sabah kibogamiye kuri leta ya Turukiya, kivuga ko iyo nyandiko-mvugo cyatangaje
ikubiyemo amajwi yafatiwe imbere muri iyo ambasade, akaza kugera mu ntoki
z'ubutasi bwa Turukiya.
Iyo
nyandiko-mvugo ikubiyemo ibivugwa ko ari amagambo ya nyuma uwo munyamakuru
yavuze.
Khashoggi
yandikiraga inkuru z'ibitekerezo bye bwite ikinyamakuru Washington Post cyo
muri Amerika ndetse yabaga muri Amerika mbere y'urupfu rwe.
Yabonywe
bwa nyuma yinjira muri ambasade ya Arabie Saoudite i Istanbul ku itariki ya
kabiri y'ukwezi kwa cumi mu 2018, aho yari yagiye gushaka ibyangombwa yari
akeneye ngo abashe gushakana n'umukunzi we ukomoka muri Turukiya.
Urupfu
rwe mu buryo bw'amayobera rwatumye Arabie Saoudite yibazwaho cyane, leta y'iki
gihugu nyuma yaho iza gutanga amakuru arimo kubusanya ajyanye n'uburyo ivuga ko
yishwe.
Kuva
icyo gihe, abategetsi ba Arabie Saoudite begetse iyicwa rye ku gikorwa
"cyatandukiriye" ndetse igeza mu bucamanza abagabo 11 ishinja
kumwica.
Ikinyamakuru cyo muri Turukiya kivuga iki?
Ikinyamakuru
Sabah cyakomeje kugenda gishingirwaho mu nkuru z'ibitangazamakuru mpuzamahanga
kubera gutangaza amakuru arimo amwe ataravuzweho rumwe ajyanye n'urupfu
rw'amayobera rw'uwo munyamakuru.
Muri
iki cyumweru, iki kinyamakuru cyatangaje inkuru ebyiri nshya ku rupfu rwa
Khashoggi wishwe n'itsinda cyise "itsinda ry'abishi".
Inkuru
iheruka ya vuba muri izo, itangaza mu buryo burambuye ibivugwa ko ari amajwi yo
mu iyicwa rye.
Irimo
amakuru nk'ay'impuguke mu kugenza ibimenyetso by'ibyaha, wari mu itsinda
ryoherejwe rivuye muri Arabie Saoudite, bivugwa ko yavugaga ko uwo munyamakuru
ari "inyamaswa yo guturamo igitambo", mbere y'uko agera kuri iyo
ambasade.
Ikinyamakuru
Sabah gitangaza ko Khashoggi, amaze kugera muri ambasade, yagize amakenga
akabwirwa ko agomba gusubira mu murwa mukuru Riyadh wa Arabie Saoudite kubera
itegeko ryatanzwe na polisi mpuzamahanga, Interpol.
Bivugwa
ko uyu munyamakuru yanze ibyo yasabwaga n'iryo tsinda, birimo nko kwandikira
umuhungu we ubutumwa bugufi kuri telefone, agahita ahabwa imiti yo gutuma ata
ubwenge, nkuko iki kinyamakuru kibivuga.
Amakuru
avuga ko yahise asaba abishi be, mu magambo ye ya nyuma, kudakomeza gupfuka
umunwa we kuko arwaye indwara ya 'asathma' yo mu myanya y'ubuhumekero, ariko
agahita ata ubwenge.
Khashoggi
yahejejwe umwuka yashyizwe umufuka mu mutwe ni ko iki kinyamakuru Sabah kivuga ndetse
bikavugwa ko urusaku rwo kugundagurana rwumvikana muri ayo majwi.
Iki
kinyamakuru kinavuga ko ayo majwi yumvikanisha umurambo ukatagurwamo uduce
n'impuguke mu kugenza ibimenyetso by'ibyaha.
Amakuru
yuko hari amajwi yumvikanisha iyicwa rya Khashoggi yakomeje kuvugwaho guhera mu
mwaka ushize.
Abategetsi
ba Turukiya bemeje ku mugaragaro ko ayo majwi ahari ndetse bavuga ko
bayasangije ibindi bihugu, ariko ntibizwi uburyo iki kinyamakuru bisa nkaho
yakigezeho.
Mu
gihe hafi umwaka umwe ugiye gushira nyuma y'urupfu rwe, umurambo wa Khashoggi
ntabwo uraboneka nubwo amahanga yakomeje kotsa igitutu Arabie Saoudite.
Mu
ntangiriro y'uyu mwaka, impuguke y'umuryango w'abibumbye (ONU) mu guperereza
ubwicanyi butabanjirijwe n'ubutabera yasabye ko hakorwa iperereza ryigenga
kandi ritabogamye ku rupfu rwe.
Iyi
ntumwa idasanzwe ya ONU, Agnès Callamard, yavuze ko urupfu rw'uwo munyamakuru
ari "ubwicanyi bwakozwe ku bwende, bwabanje gutegurwa".
Yongeyeho
ati: "Leta ya Arabie Saoudite ni yo yo kubiryozwa", anavuga ko ikwiye
gukorwaho iperereza.
Leta
ya Arabie Saoudite yamaganye raporo ye ndetse yakomeje kugenda ihakana ko
abamwishe ari yo yari yabibategetse.
TANGA IGITECYEREZO