Bruce Melodie yishimiwe bidasanzwe mu gitaramo giherekeza umuhango wo ‘Kwita izina’-AMAFOTO

Bruce Melodie yishimiwe bidasanzwe! Yaserutse yambaye sheneti nyinshi mu ijosi, bandana mu mutwe, umusatsi yakaraze. Indirimbo ze zoze yaririmbye yafashwaga mu miririmbire n’abitabiriye igitaramo n’ubwo zose atazirangizaga.

Yaririmbye afashwa na Symphony Band. Kigali Arena yashyizwemo inyakiramashusho zirindwi zifasha abitabiriye kunogerwa n’igitaramo cyo kuganura iyi nzu nshya y’imyidagaduro.

Itsinda rya Charly&Nina ryaririmbye muri iki gitaramo indirimbo nka “Zahabu”. Ku rubyiniro bari bitwaje ababyinnyi batatu b’abasore.

Aba bahanzikazi baririmbiye muri Kigali Arena nyuma yo kuva muri Uganda mu bikorwa by’umuziki bagize ibanga. Bakomereje ku ndirimbo “Nibyo” baherutse gushyira hanze mu minsi ishize. Baririmbye kandi indirimbo “Agatege” na 'Lazizi’.

Bageze ku ndirimbo ‘Face to face’ basabye abazungu babiri kubasanga ku rubyiniro babafasha kubyina iyi ndirimbo. Bavuye ku rubyiniro saa tatu n’iminota 16’.

Charly&Nina mu gitaramo

Bruce Melodie yakiriwe ku rubyiniro saa tatu n’iminota 16’. Yahereye ku ndirimbo “Kungola” yakoranye n’umuhanzikazi Sunny. Iyi ndirimbo yatumye akura ubukonje mu bafana bari bamaze kuririmbirwa n’itsinda rya Charly&Nina.

Yakomereje ku ndirimbo yise “Ntundize’, ni imwe mu ndirimbo yamwaguriye igikundiro ku buryo ayiririmba akikirizwa na benshi banyuzwe n’ubuhanga bw’uyu musore.

Bruce Melodie watwaye Primus Guma Guma Super Stars yakoresheje ubuhanga mu miririmbire ye.

Indirimbo ye yise “Ntundize’ yaririmbwe n’umubare utari muke w'abari bitabiriye iki gitaramo. Yaririmbye kandi indirimbo “Complete me” nayo yamuhaye ikuzo mu muziki nyarwanda, yongeyeho indirimbo “Tuza” yakoranye n’umuhanzikazi Allioni. 

Ni indirimbo imaze amezi macye isohotse yahuriranye no gukundwa mu buryo bukomeye ku buryo byafashije Allioni kongera kwisanga mu kibuga cy’umuziki. Yasoje kuyiririmba akomerwa amashyi, abafana bungikanyamo baririmba amwe mu magambo ayigize.

Bruce Melodie yaririmbye anibutsa indirimbo zamuhaye igikundiro nka “Umuhungu wa muzika” yasendereje ibyishimo by’abaganuye Kigali Arena, yungamo indirimbo “Twarayarangije” yakoranye n’umuraperi Ama G The Black  baje gushwana.

Yongeyeho indirimbo “I am back” yakoranye n’umuraperi Jay C ikamuha ijambo, yaririmbye kandi indirimbo “Ikinya” yabaye idarapo ry’umuziki we mu 2017.

Iyi ndirimbo “Ikinya” yayishyizemo amagambo avuga ku itsinzi ya Perezida Paul Kagame mu matora yo muri 2017.

Yasoje kuyiririmba abitabiriye bavuza akaruru k’ibyishimo abandi bakoma amashyi y’urufaya. Mbere y’uko aririmba indirimbo “Ntakibazo” yabanje gusaba abitabiriye gufatanya kuyiririmba kuko yayifatanyije n’abandi bahanzi. Ni indirimbo yabaye idarapo ry’umuziki mu 2018.

Uyu muhanzi yasoreje ku ndirimbo “Kungola” yakoranye n’umuhanzi Sunny kuri ubu uri kubaririzwa muri Tanzania.

Ni indirimbo yatumye Sunny amenyekana hiyongera n’udushya akora twazengurutse igihe ku mbuga nkoranyambaga. Iyi ndirimbo imaze igihe yigaruriye utubyiniro tw’i Kigali n’ahandi.

Nina mu gitaramo cyo muri Kigali Arena

Ange na Mc Tino nibo bashyushyarugamba

Umunyamideli Shaddy Boo waryubatse ku mbuga nkoranyambaga ntiyatanzwe

Abafana bari benshi muri iki gitaramo