Ahabanza Imikino

Antoine Griezmann yafashije FC Barcelona kunyagira Real Betis, Real Madrid yanganyije

Yanditswe na: Mugabe Jean Paul
Taliki:26/08/2019 9:20 0

Mu mpera z’iki cyumweru kuva tariki ya 23 Kanama 2019, shampiyona y’igihugu cya Esipanye yakomezaga, aho ikipe ya FC Barcelona yanyagiye Real Betis, iyitsinda 5-2, Griezmann agira uruhare mu bitego 3, atsinda bibiri atanga umupira wavuyemo igitego (Assist), naho Real Madrid inganya na Real Valladolid 1-1.

Ni imikino yatangiye kuri uyu wa Gatanu aho ikipe ya Seville yatsinze Granada 1-0 bituma ikomeza kwitwara neza dore ko kuri ubu ariyo iri imbere ku rutonde rw’agateganyo n’amanota 6. Ku wa Gatandatu ikipe ya Real Madrid yari yagiye gusura ikipe Real Valladolid, ntibyayihira kuko umukino warangiye ikipe zombi zije kunganya 1-1. Ikipe ya Real Madrid niyo yafunguye amazamu ku gitego cyatsinzwe na Karim Benzema ku munota wa 82 maze ku munota wa 88 Sergio Guardiola aza kucyishyura.

Serigio Guardiola watsinze igitego cyo kwishyura cya Real Valladolid

Undi mukino wabaye kuri iki cyumweru FC Barcelona yanyagiye Real Betis ibitego 5-2, Antoine Griezmann atsindamo ibitego bibiri wenyine atanga n’umupira wavuyemo igitego. Ikipe ya Real Betis ni yo yinjiye mu mukino mbere aho yaje gutsinda igitego gifungura amazamu ku munota wa 15 gitsinzwe na Nabil Fekir. Ibintu byaje kuba bibi kuri FC Barcelona yakinaga idafite Luis Suarez na Lionel Messi hakomejwe kwibaza umuntu ushobora kuba yayiyobora mu gihe aba bakinnyi ntabayirimo.

Antoine Griezmann watsinze ibitego bibiri anatanga umupira wavuyemo igitego

Nyamara Antoine Griezmann ntiyatize gusubiza iki cyibazo cyibazwaga na benshi aho ku munota wa 41 yaje gutsinda igitego cyo kwishyura amakipe yombi ajya kuruhuka anganya 1-1. Mu gice cya kabiri ku munota wa 51 Antoine Griezmann yatsinze igitego cye cya kabiri cyikaba n’igitego cya kabiri muri FC Barcelona. Ibindi bitego bya FC Barcelona byatsinzwe na Carles Perez 56’, Jordi Alba 60’ na Arturo Vidal 77’. Naho ibitego bya Real Betis byaje gutsindwa na Nabil Fekir 15’ na Loren Moron 79’. Umukino warangiye FC Barcelona itsinze Real Betis 5-2.

Zinedine Zidane umutoza wa Real Madrid watakaje umukino wa shampiyona