Amaranye uburwayi imyaka irenga 10, kujya kwivuza i Kigali byaramunaniye

Ubu burwayi bwa Immaculee ngo bwatangiye bimeze nk’ibuye ryibumbye mu mubiri, hanyuma aza kujya kubagwa ku bitaro bya Shyira, ariko nyuma biza kongera kugaruka. Avuga ko ubwo aheruka i Kigali atabashije kwivuza neza ku buryo bamenya indwara afite ndetse ngo anavurwe.

Avuga ko ubukene ari inzitizi ya mbere yamubujije kwivuza, dore ko ngo ubu burwayi bunyuzamo bukamubabaza cyane ndetse akabyimba ku buryo bukomeye. N’ubwo ubu burwayi bumubabaza, ntibumubuza gukora uturimo dusanzwe two mu cyaro tumubeshejeho.

Uburwayi bwa Sabagirwa bumaze imyaka irenga 10

Mu kiganiro yahaye inyarwanda ubwo twamusangaga aho atuye, Sabagirwa yavuze ko indwara ari nyinshi mu bice byo mu cyaro aho batuye, zimwe gusa zikaba ari zo zibasha kuvurirwa ku bigo nderabuzima, izindi zisaba ubuvuzi bwisumbuyeho akenshi bakunze kuba nta bushobozi bwo kuzivuza neza babona. Ubwisungane mu kwivuza ngo ni ingirakamaro ariko ngo hari n’abakennye cyane ku buryo batabasha kwivuza uko bikwiye kabone n’ubwo baba bafite ubwisungane mu kwivuza, cyane cyane iyo hajemo gukora ingendo zijya ku bitaro bitabegereye.