Inyarwanda art Studio
Kigali

Umukecuru wari waratoranyijwe mu bakobwa b'uburanga bagombaga gushyingirwa Umwami Yuhi Musinga akaba n'umwe mu bari bakuze mu Rwanda yitabye Imana

Yanditswe na: Mupende Gedeon Ndayishimiye
Taliki:6/07/2019 17:33
2

Umukecuru witwa Nyiramatama Ansila wari waratoranyijwe mu bakobwa b'uburanga bagombaga gushyingirwa Umwami Yuhi Musinga yitabye Imana ku myaka 109. Kugeza ubu biragoye kumenya umunyarwanda ukuze kurusha abandi dore ko nta rwego rurabikoraho ubushakashatsi, gusa mu bigaragara uyu mukecuru yari ari mu banyarwanda bakuze kurusha abandi.



Nyiramatama Ansila yavukiye mu murenge wa Muhazi ahahoze hitwa mu Buganza mu 1910. Mu mwaka wa 1934 ni bwo yashakanye na Rwagasore Petero. Uyu mukecuru yitabye Imana tariki 04/07/2019, asazira mu karere ka Nyagatare muri Karangazi ari naho yari atuye. Kuri iki Cyumweru taliki 7/7/2019 ni bwo uyu mukecuru ashyingurwa nk’uko Inyarwanda.com ibikesha abo mu muryango we.

Nyiramatama Ansila yasize umuryango mugari cyane dore ko yabyaye abana 6, akaba yari afite abuzukuru 25, abuzukuruza 63 n’ubuvivi 2. Imfura ye iracyariho, gusa nawe arakuze rwose dore ko afite imyaka hafi 90 y’amavuko, akaba atuye mu Ntara y’Uburasirazuba mu karere ka Ngoma mu murenge wa Rukiri.


Nyiramatama Ansila yitabye Imana ku myaka 109

Amakuru INYARWANDA yamenye avuga ko uyu mukecuru Nyiramatama Ansila akiri inkumi yari yaratoranyijwe mu bakobwa b’uburanga bagombaga gushyingirwa Umwami Yuhi Musinga. Mu myaka 109 yari amaze ku isi, uyu mukecuru yaranzwe n’urukundo, gukunda igihugu no gushishikariza abantu gukomera ku ndangagaciro za Kinyarwanda. Ni urwibutso rukomeye asigiye abo mu muryango we nk’uko Inyarwanda.com yabitangarijwe n’umwuzukuruza we Ev Fred Kalisa uri mu bavugabutumwa bakunzwe muri ADEPR.

Yagize ati “Yaranzwe n'urukundo, gukunda igihugu ndetse no gushishikariza abantu gukomera ku ndangagaciro za kinyarwanda abantu bakarangwa n’ubupfura. Ikindi navuga kuri nyogokuruza wanjye yakundaga Imana akunda gusenga nubwo yari atakibasha kugera ku rusengero ariko yoherezagayo ituro ngo barimutangire. Yari umukecuru mwiza abato bakwigiraho byinshi. Sogokuru ubyara mama wanjye akaba ari we mfura ye, aracyariho afite imyaka hafi 90.”

Uyu mukecuru yari ari mu banyarwanda bakuze kurusha abandi dore ko yitabye Imana ku myaka 109, kandi abanyarwanda bafite iyi myaka akaba ari mbarwa. Amakuru y’umuntu ukuze kurusha abandi mu Rwanda, ntiwayemeza ijana ku ijana na cyane ko nta bushakashatsi burashyirwa hanze bw’umunyarwanda ukuze kurusha abandi. Inyarwanda.com twagerageje gushakisha amakuru y’umuntu ukuze kurusha abandi mu Rwanda, tugerageza uko twayabaza muri Minisiteri y’Ubuzima (MINISANTE) ndetse no mu Kigo cy'Igihugu Gishinzwe Irangamimerere (NIDA), ariko ntibyadukundira (Tuzakurikirana aya makuru).

Hari amakuru avuga ko umuntu ukuze kurusha abandi ku isi, ashobora kuba ari umunyarwandakazi witwa Nyiramandarare utuye i Nyamirambo, ufite imyaka 118 niba koko imyaka iri mu byangombwa bye ihuye n’imyaka afite. Mu mwaka wa 2018, RBA yatangaje inkuru y’umukecuru byakekwaga ko ari we wari ukuze kurusha abandi mu Rwanda aho yari afite imyaka 116 muri 2018 dore ko yavutse mu tariki 1 Mutarama 1902. Icyo gihe RBA imusura yari yakorewe ibirori by’isabukuru y’amavuko n'abana be. Ni umukecuru utuye mu Kagari ka Musenda Mu murenge wa Gatebe ho mu Karere ka Burera mu Majyaruguru y’igihugu. Hari n’andi makuru avuga ko i Rukara muri Kayonza hari umusaza ufite imyaka hafi 130 y’ubukure.


Ev Fred Kalisa umwe mu buzukuruza 63 ba Nyiramatama Ansila







IBITECYEREZO

  • Umusaza2 months ago
    Muzaze hano mu murenge wa gahanga mukagali ka nunga ya 1 mubaze umusaza witwa hingabugabo iyo myaka arayirengeje
  • Nsimiyimana marc2 months ago
    Uyumucyecuru rwose Imana imwakire mubayo yarakuze yanarezeneza Iyabarinkibikundatwese tukanjyadusazatugezenkahoyarageze byababyiza


Inyarwanda BACKGROUND