Inyarwanda art Studio
Kigali

Ambasaderi wa Tanzania mu Rwanda yakiriye Korali Blessed Maria Thereza Ledochowska yatumiwe mu gitaramo i Kigali

Yanditswe na: Janvier Iyamuremye
Taliki:29/06/2019 11:43
0

Ambasaderi w’igihugu cya Tanzania mu Rwanda, Ernest Jumbe Mangu, mu gitondo cy’uyu wa Gatanu tariki 28 Kamena 2019, yakiriye mu biro bye Korali Blessed Maria Thereza Ledochowska izaririmba mu gitaramo gikomeye ‘East Africa Gospel Concert’ cyateguwe na Korali Il Est Vivant.



Chorale Il Est Vivant yo muri paruwasi Regina pacis i Remera ya Kigali, igeze kure imyiteguro y’igitaramo gikomeye yateguye yise “East Africa Gospel Concert”.

Iki gitaramo kizaba kuri iki cyumweru tariki ya 30 Kamena 2019 muri Hill Top i Remera. Ni muri urwo rwego yatumiye Korali ikomeye yo mu gihugu cya Tanzania ho mu Mujyi wa Dodoma yitwa Blessed Maria Thereza Ledochowska.

Aba bashyitsi bagizwe n’abaririmbyi ndetse n’abakristu basaga 150 baturutse muri Arikidiyoseze ya Dodoma bageze mu Rwanda bakirwa cyami. Bari baherekejwe na Polisi y’u Rwanda kuva ku mupaka wa Rusumo kugera kuri Paruwasi Regina Pacis i Remera.

Abashyitsi bahise bajya kuri Ambasade y’Igihugu cyabo cya Tanzania mu Rwanda iherereye i Nyarutarama mu Mujyi wa Kigali maze bakiranwa ubwuzu n’Ambasaderi w’Igihugu cyabo hashimangirwa umubano mwiza w’ibihugu byombi utari gusa mu bya dipolomasi ahubwo umubano ukomeza ukagera no ku rwego rw’abaturage.

Aba bashyitsi kandi bashoboye gutembera mu Mujyi wa Kigali bareba aho u Rwanda rugeze ari nako abanyarwanda babakirana yombi.

Ambasaderi wa Tanzania mu Rwanda, Ernest Jumbe Mangu [wambaye ikositimu y'ibaru ry'ubururu bwerurutse] yakiriye abagize korali Blessed Maria Thereza

Biteganyijwe ko aba bashyitsi kuri uyu wa gatandatu taliki ya 29 Kamena 2019 bajya i Kibeho gusura ubutaka butagatifu biturutse ku kuba Chorale il est viavnt nayo yaragiye muri Tanzania muri Nyakanga bakagaragaza ubutumwa bwa Bikiramariya w’i Kibeho.

Ibyo rero byabaye imbarutso yo guhaguka bafite amatsiko menshi yo gusura Kibeho ngo birebere iby’ayo mabonekerwa, cyane ko n’ubusanzwe akurura abanyamahanga benshi baba abakristu cyangwa n’abandi.

Iki gitaramo ‘East Africa Gospel Talent’ giteganijwe kuri iki cyumweru taliki ya 30 Kamena 2019 i saa kumi z’umugoroba kuri Hill Top i Remera.

Amatike ubu araboneka muri Centre Christus I Remera, Sainte Famille, Saint Michel, Paruwasi Regina Pacis Remera. Ariko abantu bashobora no kuzayagura ku miryango ya Hill Top Hotel ku cyumweru mbere y’igitaramo.

Aba bashyitsi bitaganijwe ko bazasubira iwabo muri Tanzania kuwa kuya 01 Nyakanga 2019.

Ambasaderi wa Tanzania mu Rwanda

Aba bashyitsi batemberejwe bimwe mu bice by'Umujyi wa Kigali

Bavuye ku mupaka baherekejwe na Polisi y'Igihugu kugera i Kigali

Inyubako y'Ibiro by'Ambasaderi wa Tanzania mu Rwanda, iherereye Nyarutarama








Inyarwanda BACKGROUND