iTel
Kigali

Hafunguwe ku mugaragaro Lucky Jersey, indi Fan Club ya Rayon Sports-AMAFOTO

Yanditswe na: Mihigo Saddam
Taliki:13/05/2019 17:18
1

Rayon Sports ni ikipe bizwi ko ifita abakunzi benshi mu Rwanda ndetse ikaba imwe mu makipe afite uyu mubare mu karere ka Afurika y’ibirasirazuba (EAC). Kuri ubu rero muri gahunda yo kugura ngo abafana bagire aho babarizwa, hafunguwe Lucky Jersey irindi tsinda ry’abafana ba Rayon Sports baje kongera ingufu ku zisanzwe zihari.



Kuri iki Cyumweru tariki ya 12 Gicurasi 2019 ni bwo Lucky Jersey Fan Club yafunguwe ku mugaragaro muri gahunda yitabiriwe n’abayobozi b’andi matsinda y’abafana atandukanye, abakinnyi n’abandi bose bafite aho bahurira n’ikipe ya Rayon Sports.



Lukcy Jersey Fan Club yafunguwe ku mugaragaro ku Cyumweru tariki 12 Gicurasi 2019 

Mutaganzwa Dieudonne perezida wa Lucky Jersey Fan Club avuga ko iyi Fan Club yari imaze amezi atatu (3) iriho inafite abanyamuryango fatizo ariko kuri ubu igihe kikaba cyari kigeze kugira ngo ifungurwe ku mugaragaro. Avuga ko kandi intego bafite ari ugushyigikira ikipe ya Rayon Sports bamaze kuba abanyamuryango 58 bazagenda biyongera uko iminsi yicuma.

Kimwe mu bintu by’umwihariko ya Lucky Jersey Fan Club ni uko bazajya bishyura imiti umuganga w’ikipe azajya aba yaguze muri Farumasi mu ivurwa ry’abakinnyi ba Rayon Sports. Lucky Jersey Fan Club kandi izakomereza aho ayandi matsinda ageze atanga imisanzu ifasha ikipe buri kwezi.

“Icyo gikorwa twakivuganye n’umuganga mukuru wa Rayon Sports, Mugemana Charles. Yatubwiye ko imiti azajya agura muri farumasi. Twamwemereye ko iyo azajya acyenera yose tuzajya tuyishyura. Yatubwiye ibiciro kandi tuzabishyira mu bikorwa”. Mutaganzwa


Mutaganzwa Dieudonne perezida wa Lucky Jersey Fan Club aganira n'abanyamakuru

Bigandanye no kuba muri iki gihe umupira w’amaguru usaba amikoro kugira ngo haboneke umusaruro, Mutaganzwa avuga ko Lucky Jersey Fan Club bagomba kujya batanga umusanzu kugira ngo ikipe yabo Rayon Sports ikomeze ibeho ishikamye.

“Iki gihe umupira wajemo amafaranga menshi. Ni yo mpamvu rero tuzajya dutanga umusanzu kugira ngo tugure abakinnyi bari ku rwego rwiza rwo guhangana n’amakipe kandi ikipe yacu ihore ku bikombe”. Mutaganzwa


Mutaganzwa Dieudonne (Ibumoso) perezida wa Lucky Jersey Fan Club na Runigababisha Mike (Iburyo) perezida wa Fan Base 

Akenshi usanga hashingwa amatsinda y’abafana (Fan Clubs) akabaho akanya gato nyuma ukumva yarasenyutse. Mutaganzwa avuga ko ari ibintu bimubabaza kandi ko yizeza abafana ba Rayon Sports ko Lucky Jersey Fan Club itazigera ivaho nk’uko izindi zagiye zigenda.

Runigababisha Mike umuyobozi w’ihuriro ry’amatsinda y’abafana ba Rayon Sports (Rayon Sports Fan Base) yavuze ko nka Fan Base bishimira ko Lucky Jersey Fan Club izanye ingamba nshya zizafasha mu iterambere ry’ikipe yabo bakunda.

Runigababisha avuga ko kuva muri Mutarama 2018 batangiye ari Fan Clubs zirindwi (7) ariko kuri bakaba babara Fan Clubs 32 mu gihe zari 42 zikagenda zimanuka kuko hari icumi (10) zabaye zihagaze kubera kutubahiriza imirongo ngenderwaho.

“Kuza kwa Lucky Jersey Fan Club ni ikintu cyiza kuko Rayon Sports iba igenda yaguka. Ariko noneho mu buryo buri ku murongo bushobora kugira icyo buyifasha, buhoraho nka buri kwezi. Rayon Sports ifite abafana benshi batatanye ariko ni byiza ko bahuza izo mbaraga zabo biciye muri Fan Clubs”. Runigababisha


Runigababisha Mike umuyobozi w'ihuriro ry'amatsinda akunda Rayon Sports (Rayon Sports Fan Base) 

Ihuriro ry’amatsinda afana ikipe ya Rayon Sports (Fan Base) yatangiye muri Mutarama 2018 irimo amatsinda arindwi (7) arimo; Gikundiro Forever, March’Generation Fan Club, Thé Vert, Vision Fan Club n’izindi. Kuri ubu Fan Base irabara amatsinda (Fan Clubs) 32 zitanga umusanzu buri kwezi bigafasha ikipe ya Rayon Sports mu gukemura ibibazo by’amikoro.



Aba-Rayons bashyize imbaraga hamwe kugira ngo ikipe yabo ikomeze ibe ubukombe 


Mazimpaka Andre umunyezamu ugezweho muri Rayon Sports yitabiriye uyu muhango anagira icyo avuga anashima uruhare abafana bagira ku iterambere ry'ikipe   

PHOTOS: Iradukunda Desanjo (Inyarwanda.com)






IBITECYEREZO

  • Munyaneza Evariste2 months ago
    nibyiza ko umukino wose ufatwa no,ukomeye rayon dukomeze twiyubake Ese ko dushigaje 3equipes tuzakir amo equipes zingahe? donc imikino ingahe hanze ingahe tuzakira?


Inyarwanda BACKGROUND

Copyright © 2008-2019 Inyarwanda Ltd
RSS