iTel
Kigali

MU MAFOTO 100: Kingdom of God yagaragaje ubuhanga mu gitaramo yatumiyemo Bugembe cyaranzwe n'udushya-VIDEO

Yanditswe na: Mupende Gedeon Ndayishimiye
Taliki:13/05/2019 13:27
0

Kingdom of God Ministry ikunzwe n'abatari bacye mu Rwanda yamamaye mu ndirimbo 'Sinzava aho uri', 'Nzamuhimbaza' n'izindi, yamuritse album yayo nshya y'amashusho mu gitaramo cyabaye kuri iki Cyumweru tariki 12/05/2019 muri Camp Kigali aho yari iri kumwe na Pastor Bugembe wo muri Uganda n'abandi baririmbyi batandukanye ba hano mu Rwanda.



Muri iki gitarmo cyiswe 'Victorious Album Launch', Kingdom of God Ministry yari iri kumwe na Pastor Wilson Bugembe wo muri Uganda, Liza Kamikazi wahoze aririmba umuziki usanzwe (secular music) nyuma akaza gukizwa, Arsene Tuyi, Bosco Nshuti, Healing worship team na Alarm Ministries. Iki gitaramo Kingdom of God Ministry yamurikiyemo album nshya y'indirimbo z'amashusho yitwa 'Victorious', cyaranzwe n'ubwitabire bucye, gusa bacye bacyitabiriye bahagiriye ibihe byiza cyane bahembuka imitima binyuze mu ndiririmbo z'abahanzi n'amatsinda yaririmbye muri iki gitaramo. Icyakora kwinjira muri iki gitaramo byari byihagazeho dore ko ku muryango itike ya macye yaguraga 7,000Frw, mu myanya y'icyubahiro ikagura 12,000Frw mu gihe muri VVIP yaguraga 20,000Frw.

Kingdom of God mu gitaramo bamurikiyemo album yabo nshya y'amashusho

Mu myambaro mishya ibereye ijisho, mu majwi aryoheye amatwi, mu muziki w'umwimerere bigaherekezwa n'amagambo yomora ari mu ndirimbo zigize album yabo nshya, ni bimwe mu byatumye Kingdom of God Ministry yishimirwa cyane. Aba baririmbyi bagaragaje ubuhanga buhanitse mu miririmbire yabo ndetse wabonaga rwose ko bafashe umwanya uhagije wo gutegura indirimbo baririmbye muri iki gitaramo. Kingdom of God bahereye ku ndirimbo 'Victorious' yatewe na Sharon Gatete wiga umuziki mu ishuri ry'umuziki rya Nyundo. Yateye iyi ndirimbo mu ijwi ryiza rizira amakaraza. Nyuma y'iyi ndirimbo baririmbye izindi zitandukanye zikubiye kuri album yabo nshya bise 'Victorious'.


Pastor Bugembe mu gitaramo yatumiwemo na Kingdom of God


Patient Bizimana na Alex Muyoboye bitabiriye iki gitaramo

Kingdom of God Ministry yakoze iki gitaramo itari kumwe na Byiringiro Eric uzwi cyane nka Kadogo umwe mu baririmbyi bayo bakomeye, uyu Kadogo akaba aherutse kugira ibyago aho yapfushije se wabo witwa Mucyuranyana Jacques wari uzwi cyane nka Mucyo uri mu batangije itsinda Healing worship team. Icyakora ntabwo icyuho cya Kadogo cyagaragaye muri iki gitaramo dore ko Yayeli, Sharon, Betty, Dismas n'abandi bagize Kingdom of God Ministry bagaragaje ubuhanga buhanitse, bigasunikira abari muri iki gitaramo kuryoherwa cyane. Itsinda ryari rigizwe n'abaririmbyi bacye ba Kingdom of God n'abanyeshuri bize umuziki mu ishuri rya Muzika rya Nyundo, ryari rirangajwe imbere na Danny Ntigurirwa bakuriwe ingofero muri iki gitaramo biturutse ku buhanga baririmbanye mu majwi yabo y'umwimerere.


Yayeli, Betty na Esperance bamwe mu baririmbyi bakomeye muri Kingdom of God

Pastor Wilson Bugembe ni we waririmbye bwa nyuma muri iki gitaramo cyatangiye saa kumi n'igice z'umugoroba kigasozwa hafi saa yine z'ijoro. Yabanje kwihanganisha Kingdom of God ku bw'igitaramo cyabo cyaranzwe n'ubwitabire bucye. Yavuze ko 'ubu ari bwo batangiye kandi ko bazagera kure'. Yatanze ubuhamya avuga ko igitaramo yakoze bwa mbere cyitabiriwe n'abantu 5, icyo gihe umuntu umwe mu muryango we arahaguruka avugira mu ruhame ko amuteye inkunga y'amafaranga atari macye ndetse aranayamushyikiriza.

Ako kanya ariko yahise amwongorera amubwira ko agomba kuyamusubiza nyuma y'igitaramo. Nyuma y'ibyo bihe bikomeye yakomeje gukora umuziki ntiyacika intege, ubu Bugembe ni izina rikomeye mu muziki wa Gospel muri Uganda. N'ubwo muri iki gitaramo Bugembe yaririmbye mu buryo bwa 'Playback', yishimiwe cyane, gusa yafashijwe bikomeye na Yayeli n'abandi bacye bo muri Kingdom of God bazi indirimbo ze dore ko nta baririmbyi be bwite yari afite.


Wilson Bugembe wishimiwe cyane mu ndirimbo 'WANAAZA' yatangaje ko yanyuzwe bikomeye n'imiririmbire ya Kingdom of God Ministry. Ibi byamuteye kongera gutumira iri tsinda muri Uganda aho yavuze ko rizaba ari umutumirwa w'imena mu gitaramo atatangaje itariki kizabera. Yavuze ko akunda cyane u Rwanda ndetse rukaba rumuri ku mutima. Yashimangiye ibi ubwo yavugaga ko hari ibitaramo azakorera mu bihugu bitandukanye bya Afrika, mu Rwanda akaba ari ho yifuza gutangirira ibi bitaramo. Bishop Dr Fidele Masengo wari uri muri iki gitaramo yatangaje ko yaryohewe cyane n'imiririmbiye ya Kingdom of God anahishura ko umukobwa we w'imfura iri tsinda ari ryo akunda cyane mu Rwanda.


Pastor Wislon Bugembe uri mu bakunzwe cyane i Kampala

Abitabiriye igitaramo Kingdom of God Ministry yatumiyemo Bugembe bayishyigikiye bayitera inkunga, bagura DVD y'album yabo nshya. Umwe mu bitanze, yaguze iyi DVD ku mafaranga y'u Rwanda angana na miliyoni imwe (1,000,000Frw). Undi witanze menshi ni umuryango wa Bishop Dr Masengo waguze iyi DVD ku madorali 200 y'Amerika. Abandi benshi bayiguze ku madorali 100. Sinkabumwe Nganga Michel Perezida wa Kingdom of God Ministry yavuze ko banyuzwe bikomeye n'uburyo Imana yabanye nabo, igaha umunezero mwinshi abitabiriye igitaramo cyabo. Yasabye abari muri iki gitaramo, gufata umunota umwe bakunamira bagenzi babo baherutse kwitaba Imana, barimo Miss Bellange Muhikira na Mucyo se wabo wa Kadogo.

REBA ANDI MAFOTO Y'IKI GITARAMO


Yayeli (hagati) ishyiga ry'inyuma muri Kingdom of God


Sharon Kacyeye Gatete


Gaby Kamanzi mu gitaramo cya Kingdom of God

Sharon Kacyeye Gatete umwe mu baririmbyi bakomeye muri Kingdom of God


Ni igitaramo cyaranzwe n'ubwitabire bucye



Bagiriye ibihe byiza muri iki gitaramo


Arsene Tuyi yaririmbye muri iki gitaramo

Alarm Ministries mu gitaramo cya Kingdom of God

Pastor Tom Gakumba

Bishop Dr Masengo n'umugore we na Pastor John Kaiga

Ibyishimo bisendereye ku bitabiriye iki gitaramo


Liza Kamikazi n'umugabo we (iburyo) n'abana babo

Alarm Ministries yajyanye benshi mu mwanya wo gusirimbira Imana

Liza Kamikazi mu gitaramo cya Kingdom of God

David Wald umugabo wa Liza Kamikazi n'umwana wabo bari bizihiwe

Abari bashinzwe 'Protocol' biganjemo abitabiriye irushanwa rya Miss Rwanda

Bosco Nshuti yaririmbye mu gitaramo cya Kingdom of God

Umuraperikazi The Pink

Pastor Bugembe ni we wayoboye igikorwa cyo gushyigikira Kingdom of God

KANDA HANO UREBE ANDI MAFOTO

REBA UKO KINGDOM OF GOD YARIRIMBYE MU GITARAMO YATUMIYEMO BUGEMBE


AMAGAMBO AKOMEYE WILSON BUGEMBE YAVUZE KURI KINGDOM OF GOD


REBA UKO LIZA KAMIKAZI YARIRIMBYE MU GITARAMO CYA KINGDOM OF GOD


AMAFOTO: CYIZA Emmanuel-Inyarwanda Pictures

VIDEO: NIYONKURU Eric-Inyarwanda Tv





Umwanditsi

Mupende Gedeon Ndayishimiye

-

Sura Umwanditsi Nyandikira



Inyarwanda BACKGROUND

Copyright © 2008-2019 Inyarwanda Ltd
RSS