iTel
Kigali

Bishop Dr Masengo arasaba abanyamakuru gusesengura icyo yise ‘Icyorezo cyo gufana ikipe z’iburayi’

Yanditswe na: Mupende Gedeon Ndayishimiye
Taliki:8/05/2019 19:47
1

Bishop Dr Fidele Masengo umushumba mukuru w'itorero Foursquare Gospel church rifite icyicaro gikuru ku Kimironko mu mujyi wa Kigali yahaye abanyamakuru umukoro wo gusesengura icyo yise 'Icyorezo cyo gufana ikipe z'iburayi'



Bishop Dr Masengo yatanze uyu mukoro nyuma y’umukino wo kwishyura mu mikino y’amakipe yabaye aya mbare iwayo ku mugabane w’uburayi, UEFA Champions League wabaye taliki ya 7 Gicurasi 2019 aho Liverpool yari yakiriye FC Barcelona ukarangira Liverpool inyagiye FC Barcelona ibitego 4:0.


Umukino warangiye Liverpool itsinze 4:0 FC Barcelona

Mu mukino ubanza FC Barcelona yari yatsinze Liverpool 3-0, ibisobanuye ko Liverpool yasabwaga gutsinda 4-0, kugira ngo ibe yabasha kwerekeza ku mukino wa nyuma wa UEFA Champions League. Ibi byahise biha amahirwe Liverpool yo gukomeza ku mukino wa nyuma, nyuma yo gutsinda ibitego 4-3 mu mikino yombi. Byari amarira menshi ku bafana ba FC Barcelona nyuma yaho iyi kipe bafana isezerewe na Liverpool muri UEFA Champions League.

Bishop Dr Masengo akoresheje urubuga rwa Facebook mu gitondo cyo kuri uyu wa Gatatu tarki 8 Gicurasi 2019 yavuze ko mu mboni ze asanga ‘gufana ikipe z’iburayi ari icyorezo’. Yasabye abanyamakuru kubisesengura neza. Yabasabye kumusobanurira ibyiza byo gufana amakipe y’iburayi. Ati: “Nifuza kumenya ibyiza byo gufana ikipe itakuzi no gushyiraho clubs z’abafana bazo muri Afrika.”


Bishop Dr Masengo Fidele asanga gufana amakipe y'i burayi ari icyorezo

Ibi byose yabivuze ahereye ku makuru yumvise y’abantu batari bacye bashavujwe cyane no gutsindwa kwa FC Barcelona imwe mu makipe y’ibihangange ku isi. Amakuru agera ku Inyarwanda avuga ko mu bana ba Bishop Dr Masengo harimo ufana bikomeye Messi na FC Barcelona, uyu mwaka akaba nawe yababaye cyane nyuma yo gutsindwa kwa FC Barcelona. Bishop Dr Masengo yatangaje ibi nanone agendeye ku muntu yumvise wari wakoze ‘Betting’ ya miliyoni 50 avuga ko FC Barcelona iri butsinze birangira itsinzwe. Hari n'uwahise amuha 'Link' y'inkuru ivuga ku murundi wiyahuye nyuma yo gutsindwa kwa FC Barcelone.

Dore ubutumwa Bishop Dr Masengo yanyujije kuri Facebook aho yahaye umukoro abanyamakuru ba Siporo

“ICYOREZO CYO GUFANA IKIPE Z’IBURAYI

Nshuti Bavandimwe, ndifuza ko abanyamakuru bazadusesengurira iyi Thematic nise icyorezo cyo gufana ikipe z’iburayi!Njye mbona gufana ikipe z’i Burayi ari icyorezo. Nifuza kumenya ibyiza byo gufana ikipe itakuzi no gushyiraho clubs z’abafana bazo muri Africa. Hari umuntu umbwiye ko hari u wakoze betting (ikiryabarezi) ya 50 Millions avuga ko Barcelona Itsinda. Umuntu ashobora kwibaza ingaruka zabyo. Si ibyo Gusa: Ingaruka zo ni ninshi: Gufata umwanya w’imiryango biviramo Umubano Mubi w’abashakanye, gufata umwanya wo gukora indi mirimo, kujya impaka z’urudaca, gucika ururondogoro, betting y’amafaranga, gutinda mu kabare na depenses bijyanye, agahinda, umunaniro, imigwi mibi, Inkuru ziwubanziriza n’iziwuherekeza (Kigali Matimba n’amaguru), etc.

Twakora Iki ngo twirinde inzi ngaruka?”

Nyuma y’ubu butumwa hari abagize icyo bamuvugaho mu bamukurikira kuri Facebook. Felix Muramutsa yagize ati: “Urakoze Bishop Fidèle Masengo. Fanatism ni mbi aho ihera ikagera: haba muri sport, muri politiki ndetse no mu Iyobokamana. Kandi uwafashwe n’icyo cyorezo, ntabasha kumenya cg kwemera ko arwaye cyangwa afite ikibzo.” Yakomeje agira ati: “Twahera ku bakirisitu tukamenya ko fanatism ari mbi, bitandukanye no gukunda cyangwa gukora sport....Nkeka integrisme religieux na yo ari fanatism, aho bamwe bitwaza imyemerere bagahitana abo babona batemera kimwe....”

Patrick Makombe yagize ati: “Mu by’ukuri bishop, iki ni cyorezo mu bindi byorezo, abakirisitu bafite. Ibaze aho abakirisitu basiga amateraniro, ngo bagiye kureba umupira w'iburaya, mbese kuba imbere y'Imana babirutisha kuba imbere ya eclan ya TV, ngo barimo gufana no kwiratana abatabazi. Uyu ni umwuka wa satani wo gusamaza abakirisitu.” Mbere y'uko yandika ubu butumwa, hari ubundi yari yabanje kwandika ubundi bugira buti: "Ba Messi baratsindwa ariko hari Mesiya udatsindwa."


Ubutumwa Bishop Dr Masengo yanyujije kuri Facebook







IBITECYEREZO

  • Theo2 months ago
    Nibarize Masengo: Ukora iyihe sport, widagadura ute, ni iyihe myidagaduro (entertainment) igushimisha? Gufana si icyirezo, uretse ko ni gukabya cyangwa kudashyiramo ubwenge atari byiza.


Inyarwanda BACKGROUND

Copyright © 2008-2019 Inyarwanda Ltd
RSS