iTel
Kigali

RDC: Abarwayi bane barwaye Ebola baburiwe irengero

Yanditswe na: Kaliza Liliane
Taliki:28/02/2019 14:44
0

Minisiteri y'ubuzima muri Repubulika ya Demokarasi ya Kongo ivuga ko umupolisi umwe yishwe naho abarwayi bane ba Ebola bakaba baburiwe irengero nyuma yaho ku wa gatatu nijoro ikigo kivurirwamo Ebola cy'i Butembo kigabweho igitero.



Ni igitero cya kabiri kigabwe ahavurirwa Ebola mu ntara ya Kivu y'Amajyaruguru mu Burasirazuba bw'igihugu cya RDC mu gihe cy'iminsi itatu n'abantu bitwaje intwaro bataramenyekana. Muri ibi bitero byombi, aba bantu bitwaje intwaro batwitse ahavurirwa Ebola ndetse bamena n'ibikoresho byifashishwa mu buvuzi.

Minisiteri y'ubuzima muri Congo ivuga ko iri gushakisha aho abarwayi ba Ebola bane batorotse muri icyo gitero cy'i Butembo baba baherereye. Bashobora kwanduza cyane iyi ndwara abandi bantu mu gihe baba bahuye na bo.

Abandi bantu 32 bacyekwaho kuba barwaye Ebola na bo baratorotse ubwo abantu bitwaje intwaro batwikaga iki kigo cy'i Butembo kivurirwamo Ebola. Ntibiramenyekana neza niba abagabye iki gitero barashakaga gutorocyesha abahavurirwaga.

Leta ya Congo itangaza ko ubu igiye kohereza abasirikare gucunga umutekano w'ibigo bivurirwamo Ebola. Muri aka gace k'Uburasirazuba bwa Congo kagaragaramo indwara ya Ebola, abakora mu bikorwa by'ubuzima bagiye bahura n'ingorane yo kutagirirwa icyizere na bamwe mu batuye ako gace.

Ibiro ntaramakuru Reuters bisubiramo amagambo akubiye mu itangazo ry'ishyirahamwe ry'abaganga batagira umupaka ba Médecins Sans Frontières (MSF)  rifatanya na Minisiteri y'ubuzima ya Congo mu kwita kuri icyo kigo cyo kuvuriramo Ebola cy'i Butembo, rivuga ko ryamaganye icyo "gitero giteye isoni".

MSF yongeyeho ko kuri ubu, ibikorwa byayo biri kwibanda ku gucunga umutekano w'abarwayi n'abakozi bayo. Abantu barenga 550 ni bo bamaze kwicwa n'iyi ndwara ya Ebola kuva yatangazwa ko yongeye kwaduka muri Congo mu kwezi kwa munani mu mwaka ushize wa 2018 ku nshuro ya 10 mu mateka y'iki gihugu kuva yahagaragara bwa mbere mu mwaka wa 1976 kandi bisa nk'aho itazahacika mu gihe cya vuba.

Src: BBC





Umwanditsi

Kaliza Liliane

-

Sura Umwanditsi Nyandikira



Inyarwanda BACKGROUND

Copyright © 2008-2019 Inyarwanda Ltd
RSS