Shakira yahamagajwe n’urukiko rwo muri Espagne

The Guardian yanditse ko umushinjacyaha wakurikiranye iki kirego guhera mu Ukuboza 2018, yatangaje ko Shakira yanze kwishyura iyi misoro nyamara yari atuye Bahamas muri Catalonia.

Muri 2015 Shakira yavuye Bahamas ajya gutura muri Espagne, abana  n’umukunzi we Gerard Pique ndetse n’abana babo babiri. Ariko ubushinjacyaha buvuga ko uyu muhanzikazi 2012-2014 yari atuye mu mujyi wa Catalan ari nayo mpamvu akwiye kwishyura imisoro muri Espagne kubyo yinjije muri iyo myaka.

Bavuga ko Shakira yabaye igihe kinini umuturage wa Espagne ahubwo agakunda kujya hanze y’igihugu mu ngendo za hato na hato.

Mu ijoro ryo kuwa mbere nibwo urukiko rwiyemeje gukurikirana iki kirego ruhamagaza Shakira kuya 12 Kamena 2019.

Umuvugizi w’Urukiko yanze kugira icyo kuvuga kuri iyi raporo ishinja Shakira kunyereza imisoro. Abashinzwe imisoro muri Espagne batangiye gukora iperereza kuri uyu muhanzikazi guhera muri Mutarama 2018.

Umunyamategeko we avuga ko umuhanzi we yakunze kuba ahantu henshi hatandukanye ‘bitewe n’akazi akora’. Anavuga ko  umukiriya we atabaga muri Espagne muri 2015 kuburyo ya kwishyura imisoro ashinjwa kunyereza.

Ikinyamakuru cyo muri Espagne, El Periódico cyanditse ko Shakira yamaze kwishyura ideni ry’imisoro.

Uyu muhanzikazi yakunzwe mu ndirimbo ‘Hips Don’t Lie’, ‘Clandestino’, akunze kwitabira imikino umukunzi Gerard Pique ukinira Bracelona agaragaramo.

Inzego zo muri Espagne zahagurukiye gushakisha ibyamamare binyereza imisoro. Mu minsi ishize Lionel Messsi ari kumwe na Se bashinjijwe kunyereza imisoro ya miliyoni €4.1 muri 2016, baciwe amande ya miliyoni € 250 000.

Kuya 22 Mutarama 2019 umunya-Portugal Cristiano Ronaldo wavuye muri Real Madrid akajya muri Juventus yaciwe amande ya miliyoni €19 ashinjwa kunyereza imisoro.

Shakira na Gerard batuye i Barcelona n'abana babo babiri.