VOLLEYBALL: REG VC yatwaye Gisagara Pre-season Tournament 2018

Ni imikino yasozwaga kuri iki Cyumweru tariki ya 21 Mutarama 2018. Seti ya mbere, REG VC yayitsinze ku manota 25-21 mbere yo gutsinda iya kabiri n’amanota 29-27. Seti ya gatatu bayitsinze bafite amanota 25-23 mbere yo guhabwa igikombe.

Gisagara Pre-Season Tournament ni irushanwa byamaze kwemezwa ko rizaba ngaruka mwaka, ryabaga ku nshuro ya mbere kugira ngo ikipe ya Gisagara Volleyball Club imurikire abafana bayo n’abatuye akarere muri rusange igikombe cya shampiyona ya 2016-2017 baheruka gutwara ku nshuro yabo ya mbere.

REG Volleyball Club yafashijwe n’abakinnyi bayo basanzwe bazwi muri Volleyball y’u Rwanda barimo; Flavien Ndamukunda , Aimable Mutuyimana ,Twagirayezu Peacemaker , Cyusa Jacob Iren, Ntagengwa Olivier  na Kwizera Pierre Marshal ukina akanaba nk’uwufasha abatoza ba REG VC (Player Coach).

Gisagara VC iba igendera ku bakinnyi nka; Karera Emile Dada, Dusabimana Vincent bita Gasongo, Muyango Theodore na Mukunzi Christophe abakinnyi baba batozwa na Nyirimana Fidele wanatojeho Rayon Sports Volleybal Club.

Nyuma yo kwegukana igikombe, Mana Jean Paul umutoza mukuru wa REG VC yavuze ko ibanga ryamufashije gutsinda iri rushanwa ribimburira shampiyona (Gisagara Pre-season Tournament 2018) ari umusaruro uva ku  bunararibonye bw’abakinnyi ndetse no gushyira hamwe.

REG Volleyball Club yahawe igikombe n’ibahasha y’ibihumbi 150 by’amafaranga y’u Rwanda (150.000 FRW). Shampiyona y'umwaka w'imikino 2018-2019 izatangira kuwa Gatandatu tariki 27 Mutarama 2018.

Mu mikino ya ½, REG VC yatsinze IPRC South VC amaseti 3-0 (25-21, 25-21 na 25-21). REG VC yari yisanze mu itsinda rya mbere (A) aho yari kumwe na APR VC na Gisagara Volleyball Club mu gihe itsinda rya kabiri (B) ryari rigizwe na UTB VC, KVC na IPRC South VC.

REG VC bishimira igikombe batwaye Gisagara VC yateguye irushanwa

Abakinnyi ba REG Volleyball Club

AMAFOTO: Isaac Kuradusenge-Authentic Radio