Kuri uyu wa gatatu imikino yo mu matsinda ya UEFA Champions league irakomeza ku isaha ya saa mbiri n’igice z’umugoroba aho umukino utegerejwe n’abantu benshi uri uza guhuza Real Madrid ya Cristiano Ronaldo na Liverpool ya Mario Balotelli.
Liverpool, imbere y’abafana bayo iraba yakira Real Madrid ifite iki gikombe yatwaye ubwo yatsindaga ku mukino wa nyuma ikipe ya Atletico Madrid.
Liverpool mu myitozo ku kibuga cyayo
Real Madrid imaze gutsinda ibitego 36 mu mikino 10 imaze gukina muri uyu mwaka w’imikino bisobanuye ko nibura kuri buri mukino itsinda ibitego biri hejuru ya 3. Umukino uheruka wa shampiyona ikaba yaratsinze ibitego 5-0 harimo 2 bya Cristiano,1 cya James Rodriguez na 1 cya Isco bose bari bubanzemo kuri uyu mukino.
Cristiano na bagenzi mu myitozo n' ubwo hari imvura ikaze
Imikino itanu Real Madrid iheruka gukina yose yarayitsinze (Levante 0-5 Real Madrid, Real Madrid 5-0 Athletic Bilibao, Ludogorets 1- 2 Real Madrid, Villarreal 0-2 Real Madrid,Real Madrid 5-1 Elche)
N’ubwo iza kuba idafite Gareth Bale ufite ikibazo cy’imvune ndetse utazanagaragara muri El Clasco nk’ uko byemejwe n’umutoza Carlos Ancelloti, Real Madrid iraza kuba igendera cyane kuri Cristiano Ronaldo umeze neza muri iyi minsi dore ko amaze gutsinda ibitego bigera kuri 15 mu mikino 7 iheruka ya shampiyona yo mu gihugu cya Espagne
Carlos Ancelloti utoza Real Madrid yatangaje ko kuba bafite umukino wa El Clasco kuri uyu wa gatandatu ku isaha ya saa kumi n’ ebyiri bitari butume bakina nabi kuko ubu icyo bashyize imbere ari ugutsindira mu rugo Liverpool
Real Madrid ikaza kuba ikoresha uburyo bwa 4 3 3 bivuze ko Karim Benzema, James Rodriguez na Cristiano Ronald baraba aribo bashinzwe kwinjiza ibitego mu izamu rya Liverpool
Cristiano Ronaldo, Karim Benzema na James Rodriguez nibo bari bushakire ibitego Real Madrid
Ku ruhande rwa Liverpool yo iraza kuba iri imbere y’ abafana bayo ku kibuga Anfield kizwiho gutera ubwoba abakinnyi benshi gukiniraho ahanini bitewe n’amateka yaho.
Liverpool idafite Daniel Sturridge iraza kuba ikina uburyo bwa 4 3 1 2 bivuze ko Mario Balotelli ukomeje guteza urujijo ahanini bitewe no kubura ibitego nk’uko byari byitezwe na Rahem Sterling aribo baza kuba bafite akazi katoroshye ko gushakisha ibitego
Raheem Sterling arafatanya na Mario Balotelli gushakisha ibitego
Mu mikino 5 iheruka ya shampiyona Liverpool yatsinzemo imikino 2 gusa, itsindwa 2 inganya umwe (QPR 2-3 Liverpool, Liverpool 2-1 West Brom, Liverpool 1-1 Everton, West Ham 3-1 Liverpool, Liverpool 0-1 Aston Villa)
Brendan Rodgers akaba yahamagariye abakinnyi be kuza kwitwara neza kandi bakitondera Cristiano Ronaldo ndetse n’ abandi bakinnyi bose.
Ababanzamo ku ruhande rwa Liverpool: Simon Mignolet, Dejan Lovren, Alberto Moreno, Javier Manquillo, Martin Skrtel, Steven Gerrard, Philippe Coutinho, Jordan Henderson, Joe Allen, Raheem Sterling, Mario Balotelli
Ababanzamo ku ruhande rwa Real Madrid: Iker Casillas, Raphael Varane, Sergio Ramos, Marcelo,Daniel Carvajal, Toni Kroos, James Rodriguez, Luka Modric, Cristiano Ronaldo, Karim Benzema, Isco
Dore uko indi mikino yose iza kuba igenda:
Itsinda A
20:45 Atletico Madrid ? - ? Malmo FF
20:45 Olympiakos ? - ? Juventus
Itsinda B
20:45 Liverpool ? - ? Real Madrid
20:45 PFC Ludogorets Razgrad ? - ? Basel
Itsinda C
20:45 Bayer Leverkusen ? - ? Zenit St. Petersburg
20:45 Monaco ? - ? Benfica
Itsinda D
20:45 Anderlecht ? - ? Arsenal
20:45 Galatasaray ? - ? Borussia Dortmund
Reba uko imikino yaraye ibaye kuri uyu wa Kabiri yagenze, aho mu mikino 8 habonetse ibitego 40 byose
Wowe ni iyihe kipe ufana? Ni iyihe uha amahirwe? Urabona iza gutsinda bingahe?
Alphonse M. PENDA
TANGA IGITECYEREZO