Tour du Rwanda 2018: Bimwe mu byo wamenya kuri iri siganwa riri kuba ku nshuro ya 10

Muri uyu mwaka wa 2018, Tour du Rwanda iri kuba ku nshuro ya cumi (10) kuva mu 2008 ubwo yari yanditswe mu bitabo by'impuzamashyirahamwe y'uyu mukino ku isi (UCI). Tour du Rwanda 2018 igizwe n'uduce (Stage) umunani (8) tuzakinwa kuva ku Cyumweru tariki 5-12 Kanama 2018. Utu duce twose duhuriza hamwe ibilometero 948.6 (948.6 Km).

Muri iyi Tour du Rwanda 2018, agace gato karimo ni urugendo rwa Kigali-Kigali (Nyamirambo) urugendo rufite intera ya kilometero 82.2 (82.2 Km) mu gihe agace kanini ari urugendo rwa Huye-Musanze (195.3 Km). Tour du Rwanda 2018 ntabwo irimo Areruya Joseph (Rwanda) wayitwaye mu 2017.

Areruya Joseph ubitse Tour du Rwanda 2017 ntabwo ahari kuko Delko Marseille akinira itatumiwe

Bimwe umuntu yamenya muri Tour du Rwanda 2018:

1.Muri iyi Tour du Rwanda 2018 harimo abakinnyi 50 (62.5%) bashya bayitabiriye ku nshuro ya mbere.

Muri Tour du Rwanda 2017, abakinnyi bashya bari ku kigero cya 59.2% mu gihe muri Tour du Rwanda 2016 bari 54%.

2.Kuva mu 2009, Tour du Rwanda imaze kwakira abakinnyi 702. Abakinnyi 457 muri 702 bamaze kugaruka ku murongo utangira buri Tour du Rwanda kuva icyo gihe mu 2009.

3.Tour du Rwanda 2018 irimo ubwenegihugu butatu bushya . Irlande ifitemo umukinnyi umwe (1), Finlande (1) na Angola (5).

4.Tour du Rwanda 2018 ihuriza hamwe ubwenegihugu 17 bisa neza no muri Tour du Rwanda 2016 na 2017. Tour du Rwanda 2010 byari 22, 2012 (15), 2009 na 2013 (12), 2014 na 2011(11).

5.Tour du Rwanda 2018 irimo amakipe atandatu (6) yitabiriye ku nshuro ya mbere mu gihe muri Tour du Rwanda 2017 yari ane (4).

Amakipe mashya uyu mwaka arimo; POC Côte de Lumière (France), Sampada Cycling Team (South Africa), Marco Pro(USA), GSP (Algeria), Team Embrace The World (Germany) na BAI-Sicasal-Petro de Luanda (Angola).

6.U Rwanda ni cyo gihugu gifite abakinnyi benshi (18) muri Tour du Rwanda 2018.

Muri aba abakinnyi 18 harimo 15 bari mu makipe atatu (3) ahagarariye u Rwanda hakiyongeraho Niyonshuti Adrien ukinira Sampada Cycling Team (South Africa), Ndayisenga Valens na Jean Claude Uwizeye bakinira POC Côte de la Lumière (France).

Team Rwanda 2018 igomba kuba ishaka imidali muri Tour du Rwanda 2018

Afurika y'Epfo niyo iza inyuma gato y'u Rwanda mu kugira abakinnyi benshi muri Tour du Rwanda (8). Aba bakinnyi bagabanyije mu makipe abiri (2) kuko batanu muri bo bari mu ikipe ya Sampada Cycling Team (South Africa) n'ikipe y'igihugu ya Afurika y'Epfo ifite batanu (5).

Dore uko ibihugu bikurikira mu kuba byaragize abakinnyi benshi muri Tour du Rwanda kuva mu 2009:

1.Rwanda 149

2.Erythrea 52

3.South Africa 50

4.Kenya 49

5.France 47

6.Ethiopia 45

7.Algeria 24

8.USA 23

9.Cameroun 22

10.Maroc 22

Nyanza-Rubavu nirwo rwari urugendo rurerure mu 2017 mu gihe ubu ari Huye-Musanze

7.Gasore Hategeka niwe ufite agahigo ko kuba ariwe wakinnye Tour du Rwanda nyinshi kuko kuva mu 2009 yari ahari ndetse n'iyi ya 2018 akaba arimo.

8.Erythrea n'u Rwanda nibyo bihugu bimaze kwegukana uduce twinshi muri Tour du Rwanda kuko bose bamaze kubikora inshuro 18. Ibindi bihugu birimo; Maroc (9), South Africa (8) na USA (7).

9.Eyob Metkel (Erythrea ) na Ndayisenga Valens (Rwanda) nibo bakinnyi bamaze gutwara uduce twinshi muri Tour du Rwanda kuko babikoze inshuro eshanu(5) kuva mu 2009. Muri uyu mwaka ntabwo Eyob Metkel na Erythrea bahari.

Eyob Metkel (Imbere), Team Diemension Data cyo kimwe na Erythrea National Team ntabwo bahari

10.Muri Tour du Rwanda 2018 harimo abakinnyi barindwi (7) bigeze gutwara nibura  agace kamwe muri Tour du Rwanda ziheruka (2009-2017). Muri abo harimo; Ndayisenga Valens (5), Nsengimana Jean Bosco (3), Azedine Lagab (2), Rugg Thimothy (2), Hadi Janvier (2), Craven (1) na Uwizeyimana Bonaventure (1).

11.Ndayisenga Valens uri muri Tour du Rwanda 2018 niwe waciye agahigo ko kuyitwara ari muto kuko muri 2014 ubwo yabigeragaho yari afite imyaka 20 n'amezi 11. Ndayisenga Valens kuri ubu ukinira ikipe ya POC Côte de la Lumière (France) aza imbere ya Areruya Joseph wayitwaye mu 2017 afite imyaka 21 n'amezi 11.

12.Merhawi Kudus yaciye agahigo ko gutwara agace ka Tour du Rwanda akiri muto kuko muri 2012 yabigezeho afite imyaka 18 n'amezi icumi (10). Kudus aza imbere ya Nathaniel Berhane wabikoze mu 2010 afite imyaka 20 n'amezi 11, Ndayisenga Valens (2014 & 2013) ubwo yari afite imyaka 20 n'amezi 11.

Ndayisenga Valens niwe mukinnyi ufite Tour du Rwanda mu ziheruka vuba (2016)

Muri Tour du Rwanda 2017 Uwizeyimana Bonaventure yatwaye agace ka gatanu (Nyamata-Rwamagana) bivuze ko ibyiza bya Rwamagana abizi neza