Rose Mary Mbabazi Minisitiri w’urubyiruko yijeje ikigo cya “Gasore Serge Foundation” ubutatanye mu bikorwa bya buri munsi byo kwita ku buzima bw’abana babagenera amasomo, ubuvuzi no kubafasha mu buryo butandukanye bitewe n’icyo buri umwe akeneye.
Kuwa Kane tariki 15 Gashyantare 2018 ubwo uyu Minisitiri yasuraga iki kigo kiri mu murenge wa Ntarama mu Karere ka Bugesera mu ntara y’Uburasirazuba bw’u Rwanda, yavuze ko yashima cyane Gasore Serge wagize igitekerezo cyo gushinga ikigo nka “Gasore Serge Foundation” kuri ubu kikaba gifasha urubyiruko kwiyubakamo icyizere kandi ko azakomeza kubaba hafi kuko iki kigo yabonye kigomba gufatwa nk’umuryango kuko ngo bafite buri kimwe cyose kiba kiri mu muryango Nyarwanda.
Nyuma yo kubizeza ubufatanye, Rose Mary Mbabazi yagiriye inama urubyiruko ko bagomba guha agaciro ibikorwa bakorerwa muri iki kigo ndetse ko bagomba kugira umuhate n’inyota yo kureba uko babibyaza umusaruro. Muri Gasore Serge Foundation mu busanzwe bagira serivisi z’ubuzima (ubuvuzi) kuko banafitemo ibitaro bikora amasaha 24 kuri 24, igisata cy’imikino n’imyidagaduro, ibyumba bitangirwamo amasomo ku bana bakiri bato n’amatsinda y’abakora imyuga y’ubudozi n’ububoshyi.
Rose Mary Mbabazi yaganiriye n’abakora umwuga w’ububoshyi n’ubudozi muri Gasore Serge Foundation, abasaba kwagura ibikorwa byabo no guhanga udushya dutuma bahangana ku isoko ry’umurimo ndetse bagateza imbere ibikorerwa mu Rwanda (Made in Rwanda). Mu ijambo yagejeje ku basangwa yasanze muri iki kigo, Rose Mary Mbabazi yavuze ko Gasore Serge ari umugabo wo gushimwa kuko ngo yagize byinshi akora by’indashyikirwa atarageza n’imyaka 40 y’amavuko.
Kuri ubu Gasore Serge ari muri Leta Zunze Ubumwe za Amerika aho yagiye muri gahunda yo gufata igihembo yagenewe mu kigo cy’amashuli yizeho. Rose Mary Mbabazi yavuze ko ari iby’agaciro kuba Gasore yaragize ibyo akora bityo magingo aya n’amahanga akaba amubonamo ubudahangarwa mu kwesa imihigo.
Minisitiri Rose Mary Mbabazi yakirijwe ubutumwa bw'abana
Abashyitsi binjira mu kigo cya Gasore Serge Foundation
Minisitiri w'urubyiruko Rose Mary Mbabazi asuhuza umwana
Uwamahoro Innocente (Ubanza ibumoso) ushinzwe guhuza Gasore Serge Foundation n'abakigana yakira abashyitsi anasobanura ibikorwa bikorerwa muri iki kigo
Abasangwa bahabwa impanuro
AMAFOTO: GASORE SERGE FOUNDATION MEDIA DEPARTMENT
Eng
RSS 
TANGA IGITECYEREZO