Ahabanza Imikino

Rayon Sports yakoreye imyitozo ku Mahoro, Ndayishimiye avuga ko nta gihunga afite imbere ya Rivers-AMAFOTO

Yanditswe na: Mihigo Saddam
Taliki:20/04/2017 20:18 1

Ku gicamunsi cy’uyu wa Kane tariki 20 Mata 2017 ni bwo ikipe ya Rayon Sports yakoreye imyitozo kuri sitade Amahoro ku kibuga iyi kipe izakiriraho Rivers United (Nigeria) mu mukino wo kwishyura, umukino Ndayishimiye Eric Bakame avuga ko utamuteye igihunga nubwo abafana bavuga ko yabatsindishije ibitego mu mukino ubanza.

Aganira n’abanyamakuru nyuma y’imyitozo, uyu mugabo usanzwe ari na kapiteni wa Rayon Sports yavuze ko mu mukino ubanza bagiye muri Nigeria batazi neza uko Rivers United ikina bityo bikaba byarabagoye kuyikuraho amanota atatu. “Nta gihunga ahubwo biri kudutera morale kuko icyo dushaka ni ugushimisha abafana ba Rayon Sports kandi bazishima kuwa Gatandatu”.

“Burya hari igihe ukina n’ikipe ikaba yagutsinda nawe ukaba ubona binagoye kubona igitego yakikubanje, ariko icyo nabwira abafana ba Rayon Sports nuko uko twayitekerezaga siko twayibonye. Twasanze ari kipe ifite buri kimwe, ibitego yabonye byari iby’ikipe iri iwabo”. Ndayishimiye Eric Bakame.

Ndayishimiye avuga ko magingo aya biteguye neza kandi ko ubuyobozi bubari inyuma cyo kimwe n’abafana kandi ko bazabashimisha batahana amanota atatu kuwa Gatandatu. Imyitozo yakozwe kuri uyu wa Kane yibandaga mu gutera imipira y’imiterekano ndetse no gutera amashoti agana mu izamu nyuma yo guhererekanya umupira hafi y’urubuga rw’amahina (Pressing).

Rayon Sports izakira Rivers United kuwa Gatandatu tariki 22 Mata 2017 kuri sitade Amahoro saa cyenda n’igice (15h30’), umukino Rayon Sports isabwamo ibitego 3-0 kugira ngo ihite ibona itike y’amatsinda ya CAF Total Confederations Cup.

Kwinjira kuri uyu mukino ni amafaranga ibihumbi bibiri mu myanya isanzwe (2000 FRW), ibihumbi bitatu ahatwikiriye (3000FRW), ibihumbi bitanu mu myanya yegereye iy’icyubahiro (5000 FRW), ibihumbi icumi (10.000FRW) mu myanya y’icyubahiro n’ibihumbi 20 (20.000 FRW) mu cyubahiro cyisumbuyeho.

Ndayishimiye Eric Bakame aganira n'abanyamakuru