Ahabanza Imikino

Kuba Rayon Sports yagera kure hari inyungu Masudi abona byagira ku makipe y’u Rwanda -(Amafoto y’imyitozo)

Yanditswe na: Mihigo Saddam
Taliki:14/04/2017 16:42 0

Ku wa 16 Mata 2017 ni bwo ikipe ya Rayon Sports izaba ikina na Rivers United yo muri Nigeria mu mukino w’irushanwa rihuza amakipe yatwaye ibikombe iwabo, umukino ubanza ukazatanga icyizere cyo kuzakomeza mu matsinda. Masud Djuma utoza iyi kipe avuga ko Abanyarwanda bagomba kuyishyigikira kuko igeze kure hajya hasohoka amakipe menshi.

Nyuma y’imyitozo yakoreraga ku kibuga cya Mumena, Masud Djuma yabwiye abanyamakuru ko umukino Rayon Sports izakina ari “umukino w’Ubuzima” kuko ngo ushobora guhindura amateka y’ikipe by’umwihariko ndetse no ku makipe yo mu Rwanda.

Uyu mutoza yavuze ko kuba Rayon Sports igiye gukina umukino isize andi makipe mu gihugu, byakabaye byiza bayifurije gutsinda igakomeza ikaba yanatwara igikombe kuko ngo byazababera inzira nziza yo kuzasohoka mu myaka itaha nk’uko ibindi bihugu biserukirwa n’amakipe arenze abiri.

Inyungu dufitemo ni imwe gusa, buri mwaka usanga ikipe zo mu Rwanda zivamo hakiri kare ugasanga dutangirira kure. Muri 1/32 cy’irangiza ni kure cyane. Icya kabiri nuko buri mwaka ikipe ebyiri zisohoka, abandi ugasanga bashyizemo eshatu, eshanu…enye..Ni inyungu. Ni yo mpamvu mvuga ko atari Rayon Sports igiye gukina. Kuko tugiyemo tukagera kure tukaba twanatwara igikombe, umwaka utaha haziyongeraho indi kipe yaba imwe cyangwa ebyiri, byaba ari inyungu k'u Rwanda. Masud Djuma

Masud Djuma kandi avuga ko byaba ari ibyishimo bikomeye mu gihe Rayon Sports yagera kure bigatanga amahirwe ku makipe meza ari mu Rwanda akaba nayo yakina imikino nyafurika kuko ngo byazatuma na shampiyona y’u Rwanda izamura urwego. Aha yagize ati “Ikipe nka Police, ikipe nka AS Kigali, ikipe nka Bugesera zirimo kuzamuka. Ibaze zigiye mu irushanwa Nyafurika….Ni kwa kundi usanga shampiyona iryoshye, ugasanga bifite urwego ruri hejuru.”

Mu myitozo yakozwe mu gitondo cyo kuri uyu wa Kane tariki 13 Mata 2017, abakinnyi bose bari bameze neza uretse Rwatubyaye Abdul utazanajyana n’ikipe. Mu bakinnyi bari mu myitozo barimo Nahimana Shassir wari umaze iminsi afite ikibazo cy’imvune ndetse na Mutsinzi Ange Jimmy wari waje gufasha abandi imyitozo kuko we afite umuziro w’ikarita y’umutuku yahawe bakina na Wau Al Salaam.

Abouba Sibomana Bakary wari umaze igihe ageragezwa ngo harebwe ko yazatanga umusanzu we, kuri uyu wa Kane yari ahagaze neza kuko n’umutoza Masud Djuma yavuze ko azamutwara nk’umukinnyi ufite ubunararibonye wazamufasha cyane mu bwugarizi.

Kuri uyu wa Gatanu tariki 14 Mata 2017 nibwo iyi kipe yafashe rutemikirere yerekeza mu mujyi wa Lagos aho bazafatira indi ndege izamara isaha imwe mu kirere bagana aho umukino uzabera.

Manishimwe Djabel ku mwitozo wa koruneri Rayon Sports 2