Ibyo wamenya kuri Club Deportivo Costa do Sol izahura na Rayon Sports muri Total CAF Conferations Cup 2018

Club Deportivo Costa do Sol izwi nka CD Costa do Sol ni ikipe ibarizwa mu murwa mukuru wa Mozambique (Maputo), ibarizwa mu cyiciro cya mbere muri shampiyona y’iki gihugu (Mocambola). Yashinzwe kuwa 15 Ukwakira 1955 mbere yo gutwara igikombe cya shampiyona mu 1979, igikombe cyayo cyari icya mbere mu mateka. Magingo aya ni yo kipe ifite ibikombe byinshi muri Mozambique.

Iyi kipe ntabwo yashinzwe yitwa Club Deportivo Costa do Sol kuko kuva mu 1955-1976, iyi kipe yitwaga Sport Lourenco Marques E Benfica. Iyi kipe yaje guhindura izina bayita Sport Maputo E Benfica kuva mu 1976-1976. Nyuma yaje guhabwa izina rya Club de Desportos Costa do Sol kuva mu 1978 mbere yo gutwara igikombe cya shampiyona mu 1979.

Club de Deportivo Costa do Sol yakirira imikino ku kibuga cya Estadio do Costa do Sol, sitade yakira abantu ibihumbi 10 (10.000) bicaye neza. Iyi sitade iri muri metero 500 (500m) uva ku mucanga wahitwa Costa do Sol mu mujyi wa Maputo ahavuye n’izina ryayo.

Mu bijyanye n’ibikombe, Club Deportivo Costa do Sol ifite ibikombe icyenda (9) bya shampiyona (1979, 1980, 1991, 1992, 1993,1994,1999/2000, 2001, 2007), iyi kipe ifite ibikombe 12 by’igihugu, ibikombe umuntu yagereranya n’icy’Amahoro hano iwacu mu Rwanda (1980, 1983, 1988, 1992, 1993, 1995, 1997, 1999, 2000, 2002, 2007, 2017). Igikombe cy’igihugu yatwaye mu 2017, nicyo cyayihesheje kuba iri muri iyi mikino Nyafurika.

Iyi kipe kandi ibitse ibikombe birindwi (7) biruta ibindi mu gihugu (Super Cup) yatwaye bwa mbere mu 1993 ndetse ikaba ibitse icya 2018 (1993, 1994, 2000, 2001, 2003, 2008, 2018). Ku rwego mpuzamahanga, Club Deportivo Costa do Sol yitabiriye imikino Nyafurika ihuza amakipe yabaye aya mbere iwayo (Total CAF Champions League) inshuro eshanu (5).

Bwa mbere ku nshuro yayo, iyi kipe yitabiriye mu 1999 iviramo mu ijonjora rya mbere cyo mimwe no mu 2001 na 2008. Mu 2002 iyi kipe yaviriyemo mu matsinda mu gihe mu 2008 yaviriyemo mu ijonjora ribanziriza amatsinda.

Rayon Sports yavuye muri Total CAF Champions League ikuwemo na Mamelodi Sundowns FC

Mu mikino ihuza amakipe yatwaye ibikombe by’ibihugu cyangwa amakipe aba yararangije ku mwanya wa kabiri, Club Deportivo Costa do Sol yitabiriye inshuro esheshatu (6). Mu 1980 ni bwo yitabiraga bwa mbere iviramo mu ijonjora rya mbere cyo kimwe no mu 1995. Mu 1981, 1992, 1993 n’1994 iyi kipe yaviriyemo mu ijonjora rya kabiri. Muri iyi myaka, iri rushanwa ryitwaga African Cup of Champions Clubs. Mu 2010 Club Deportivo Costa do Sol yaviriyemo mu ijonjora rya mbere mu gihe muri uyu mwaka iri mu ijonjora ribanziriza amatsinda.

Magingo aya, iyi kipe iyobowe na Amosse Chicualacuala, ifite umutoza mukuru ukomoka muri Argentina witwa Leonardo Costas. Iyo bari mu rugo bambara amakabutura y’ubururu, imipira n’amasogisi y’umuhondo. Iyo bagiye hanze ya sitade yabo nk’uko bazambara kuri sitade Amahoro, Club Deportivo Costa do Sol bambara amakabutura n’amsogisi y’umutuku bakarenzaho imipira y’umweru ifite amaboko magufi y’umutuku.

Mu mikino ya Total CAF Confederations Cup 2018, CD Costa do Sol yakuyemo itsinze Galaxy ibitego bibiri mu mikino ibiri. Umukino ubanza wakinwe kuwa 10 Gashyantare 2018, CD Costa do Sol yatsinze igitego 1-0 inabikora kuwa 21 Gashyantare 2018 ubwo bari mu rugo.

Ikipe ya kabiri bahise bahura nayo ni Cape Town City FC yo muri Afurika y’Epfo. Umukino ubanza batsinzwe na Cape Town igitego 1-0 mu mukino wabaye kuwa 7 Werurwe 2018 i Maputo. Mu mukino wo kwishyura wabereye i Cape Town kuwa 18 Werurwe 2018 ubwo na Rayon Sports yari i Pretoria, CD Costa do Sol yatsinze ibitego 2-1 ihita ikomeza.

Biteganyijwe ko umukino ubanza bafitanye na Rayon Sports uzabera kuri sitade Amahoro i Remera kuwa Kane tariki ya 5 Mata 2018 mu gihe umukino wo kwishyura uzakinwa kuwa Mbere tariki 16 Mata 2018 i Maputo ku kibuga cya Estadio do Costa do Sol.

Rayon Sports irasabwa gushaka impamba y'ibitego mu mukino ubanza