Gasamagera wari perezida wa Kiyovu Sport yeguye ahunga ibibazo

Mu butumwa Gasamagera yagejeje kuri komite ya Kiyovu Sport, Gasamagera avuga ko yafashe umwanzuro udasubirwaho wo gusezera ku mwanya wo kuba perezida kandi ko azakomeza kuyiba hafi kugira ngo ive mu rusobe rw’ibibazo irimo. “Banyamuryango, bakunzi ba Kiyovu Sport, nafashe icyemezo kidasubirwa cyo kuva ku buyobozi bwa Kiyovu. Gukunda no gukorera Kiyovu ntibisaba kuyibera perezida. Turi kumwe cyane mu gushaka icyayikura mu bibazo irimo”. Gasamagera Claude.

Gusa amakuru agera ku INYARWANDA nuko na Gashumba Damascene umunyamabanga w’iyi kipe ashobora kwegura kuko ngo ibyo abanyamuryango banengaga Gasamagera nawe bimureba. Mu byo aba bayobozi banengwa harimo kuba bataba hafi y’ikipe ngo bashakishe ubuzima yabamo itekanye.

Mu mezi arindwi n’iminsi ibiri yari amaze atowe muri komite nyobozi, Gasamagera asize Kiyovu Sport iri mu bibazo byo kudahemba abakinnyi ku matariki yagenwe ndetse no kutitwara neza muri shampiyona. Kiyovu Sport iri ku mwanya wa 13 n’amanota 22 mu mikino 22 ya shampiyona imaze gukina. Umukino iheruka yaguye miswi na Pepinieres FC banganya 0-0.