Impuzamashyirahamwe y'umupira w'amaguru ku isi (FIFA) yemereye FERWAFA ko amarushanwa yose y'umupira w'amaguru abera mu Rwanda yazakomeza mu gihe hazaba hakinwa imikino ya nyuma y'igikombe cy'isi cya 2018. Igikombe cy'isi kizakinwa tariki 14 Kamena-14 Nyakanga 2018.
Ibi byaje nyuma y'aho FIFA yari yashyizeho ibwiriza rivuga ko nta gihugu cyemerewe gukomeza amarushanwa y'umupira w'amaguru ubwo hazaba hakinwa imikino ya nyuma y'igikombe cy'isi 2018 mu Burusiya.
FERWAFA baje gukora ubushishozi basanga urutonde rw'amarushanwa ari mu Rwanda yaba atararangira mu gihe hazaba hakinwa iyi mikino ihuruza isi. Nyuma ni bwo baje kwandikira FIFA basaba uruhushya rw'uko hazakomeza aya marushanwa arimo shampiyona y'abagore n'abagabo mu byiciro byose cyo kimwe n'igikombe cy'Amahoro 2018.
Nk'uko bigaragara ku rubuga rwa FERWAFA, iri shyirahamwe ryijeje FIFA ko hatazongera kubaho ko amarushanwa nk'aya ya FIFA agongana n'amarushanwa abera imbere mu gihugu kuko ngo bazajya bagendera ku ngengabihe ya CAF. Ubutumwa bwavuye muri FIFA bisinyweho na Zvonimir Boban umunyamabanga muri FIFA buragira buti:
Mbere na mbere ndagira ngo mbashimire kuba mwaratumenyesheje ko amarushanwa yo mu Rwanda agikomeza mukaba mwifuza ko yazakomeza mu gihe cy'igikombe cy'isi 2018. FIFA nta kibazo izagira mu gihe amarushanwa yanyu yakomeza mu gihe cy'igikombe cy'isi ariko abakinnyi mwaba mufite bazajya gukinira ibihugu byayo baba barekuwe. Aba bakinnyi bagomba kuba barekuwe bitarenze tariki 21 Gicurasi 2018.
Nyuma y'uru ruhushya, amarushanwa yose y'umupira w'amaguru ategurwa na FERWAFA agomba gukomeza nta kabuza. Amarushanwa yari ateje inkeke ni shampiyona y'icyiciro cya mbere mu bagabo (Azam Rwanda Premier League 2017-2018), shampiyona y'icyiciro cya mbere n'icya kabiri mu bagore, shampiyona y'icyiciro cya kabiri mu bagabo ndetse n'igikombe cy'Amahoro 2018.
Eng
RSS 
TANGA IGITECYEREZO