Mu mukino wari utegerejwe na benshi uhuza amakipe makeba yo mu gihugu cya Espanye uzwi nka El Classico warangiye ikipe ya FC Balcelona itsinze Real Madrid ibitego 2 kuri 1 bituma ihita iyirusha amanota 4 mu gihe hakibura imikino 10 ngo shampiyona ya La Liga yo muri icyo gihugu isozwe.
Ni umukino wabaye kuri iki Cyumweru tariki 22 Werurwe 2015 , guhera i saa yine z'ijoro, ubera ku kibuga cya FC Balcelona, kuri stade ya Nou Camp witabirwa n’abafana bagera kuri 95.000. Ikipe ya FC Balcelona yari yakiriye uyu mukino ninayo yaje gufungura amazamu ku munota wa 19, igitego cyatsinzwe na Jeremy Mathieu agitsindisha umutwe, ku mupira wari uvuye kuri Coup Franc yatewe na Lionel Messi.
Mbere y’uko igice cya mbere kirangira, Cristiano Ronaldo umwe mu nkingi ya mwamba ikipe ya Real Madrid igenderaho yaje kwishyura igitego bari batsinzwe ku munota wa 31, ku mupira yari aherejwe na Karim Benzema ahita yuzuza ibitego 31 muri iyi shampiyona y'uyu mwaka. Amakipe yombi yagiye kuruhuka banganya 1-1.
Mu gice cya kabiri nibwo Luiz Suarez, rutahizamu ikipe ya FC Barcelona yaguze imukuye mu ikipe ya Liverpool yatsinze igitego cya kabiri ku munota wa 56 . Nubwo ikipe ya Real Madrid ntako itagize ngo igombore iki gitego ndetse ibe yarenzaho n’ikindi, umukino waje kurangira ari ibitego 2 bya FC Balcelona kuri 1 cya mukeba Real Madrid.Ni umukino utari woroshye kuko habonetsemo amakarita agera kuri 11 y’umuhondo, 5 ku ruhande rwa Barca ndetse na 6 yahawe ikipe ya Real Madrid.
Nyuma y’uyu mukino ikipe ya FC Barcelona ikaba yahise irusha Real Madrid zikurikina amanota 4 mu gihe habura imikino 10 ngo hamenyekane uwegukanye iki gikombe. FC Barcelona ifite amanota 68 naho Real Madrid ikagira 64.
MU MAFOTO UKO UMUKINO WAGENZE
Amakipe yombi asuhuzanya mbere y'umukino
Jeremy Mathieu atsinda igitego cya mbere n'umutwe
Myugariro Sergio Ramos wa Real Madrid ntako atagize ariko kiranga kijyamo
Nyezamu Iker Casillas yabonye inshundura zinyeganyega
Barcelona yishimira igitego cya mbere
Cristiano Ronaldo yishyura igitego
Real Madrid yishimira igitego cyo kwishyura
Cristiano ronaldo yari agiye gutsindira Real Madrid igitego cya kabiri mu gice cya mbere ariko amahirwe ntiyamusekera , umupira ugarurwa n'igiti cy'izamu , mu gihe Claudio Bravo nyezamu wa FC Barcelona atari yamenye aho umupira wanyuze.
Icya kabiri cyagezemooo!!!
Luis Suarez na bagenzi be bishimira igitego cya 2 cyabahesheje amanota 3
Mu gihe Barcelona yishimiraga igitego cya 2, ku ruhande rwa Real Madrid ni uku byari bimeze
Gareth Bale yatsinze igitego cya kabiri ku ruhande rwa Real madrid ariko umusifuzi ntiyacyemeza kubera ko hari habayeho kurarira
Nubwo yatsinze igitego, Cristiano Ronaldo yeretswe ikarita y'umuhondo kubwo kutitwara neza mu kibuga
Muhave mutarwana, umupira w'amaguru si imirwano
Lionel Messi ntako atagize ariko ntiyabashije kubona igitego muri uyu mukino
Reba hano amashusho y'uko ibitego byose byinjiye
Renzaho Christophe
TANGA IGITECYEREZO