Dylan Kerr watozaga Gormahia FC yasinye muri Black Leopards

Dylan Kerr yavuye muri Gormahia FC nyuma y’amezi 17 yari ayimaze ayiha ibikombe bibiri bya shampiyona. Kuri ubu ni umutoza wamaze kwakirwa muri Black Leopards FC ikipe izamutse mu cyiciro cya mbere muri uyu mwaka w’imikino kuko yarangije umwaka w’imikino 2017-2018 iri ku mwanya wa kabiri.

Mu mikino 79 yatoje Gormahia FC, Dylan Kerr yatsinzemo imikino 51, anganya 16 atsindwa 12, imibare yabyaye ibikombe bibiri bya shampiyona ndetse mu mwaka we wa nyuma akaba yaragejeje Gormahia FC mu matsinda ya Total CAF Confederation Cup.

Dylan Kerr wari umutoza wa Gormahia FC yakiriwe muri Black Leopards 

Amakuru ava muri Kenya avuga ko nyuma yo kugera muri Black Leopards FC, hari abakinnyi ba Gormahia FC biteganyijwe ko bagomba kumukurikira kuhira ngo bamufashe muri Black Leopards FC. Aba bakinnyi barimo; Francis Kahata ukina inyuma y’abataha izamu ndetse na myugariro Philemon Otieno.

Black Leopards yazamutse mu cyiciro cya mbere nyuma yo gusoza shampiyona y’umwaka w’imikino 2017-2018 iri ku mwanya wa kabiri mu cyiciro cya kabiri. Iyi kipe yatojweho na Ivan Minnaert kuva mu Ugushyingo 2017 kugeza muri Gashyantare 2018.

Black Leopards FC yashinzwe mu 1983 ikaba ikinira ku kibuga cya Thohoyandou Stadium yakira abafana ibihumbi 40 (40.000). Iyi kipe iyoborwa na David Thidiela ikaba yari isanzwe itozwa na  Zeca Marques. Umwanya mwiza iheruka mu cyiciro cya kabiri ni uko mu mwaka w’imikino 2014-2015 yarangije ku mwanya wa gatatu (3). Kuri ubu iri mu cyiciro cya mbere.

Black Leopards FC yigeze gutozwa na Ivan Minnaert