CECAFA KAGAME CUP 2018: APR FC yatangiye itsindwa na Singida United

Wari umukino wa mbere kuri APR FC yakinaga mu itsinda rya Gatatu (C) kuri uyu wa Gatanu tariki ya 29 Kamena 2018. Singida United ni yo yafunguye amazamu hakiri kare kuko ku munota wa karindwi (7’) ni bwo Habib Kyombo yatsinze igitego akoresheje umutwe yateye umupira wari ugaruwe na Kimenyi Yves wari mu izamu rya APR FC.

Singida United yaje kongeramo igitego cyayo cya kabiri ku munota wa 81’ gitsinzwe na John Tibar akoresheje umutwe yateye umupira wari uvuye muri koruneri yatewe na Ally Kenny bityo Ntari Steven wari mu izamu rya APR FC agarura nabi umupira awuganisha mu izamu. Igitego cy’impozamarira cya APR FC cyabonetse ku munota wa nyuma w’umukino (90+4’) gitsinzwe na Nsabimana Aimable.

Muri uyu mukino, Ljubomir Petrovic umutoza mukuru wa APR FC yari yahisemo kubanzamo ikipe n’ubundi yakoresheje bakina na FC Gicumbi ku munsi wa 29 wa shampiyona wakiniwe kuri sitade Amahoro uretse Nsabimana Aimable wari wagarutse mu mwanya we kuko icyo gihe yari afite amakarita atatu y’umuhondo akaba yari yasimbuwe na Buregeya Prince.

Mu izamu harimo Kimenyi Yves nk’ibisanzwe, Ombolenga Fitina, Rugwiro Herve, Nsabimana Aimable na Emmanuel Imanishimwe bari mu bwugarizi. Mugiraneza Jean Baptiste Miggy yakinaga imbere y’abugarira bityo imbere ye hari Nshimiyimana Amran na Buteera Andrew. Iranzi Jean Claude yacaga uruhande rumwe , Nshuti Dominique Savio agaca urundi bityo Hakizimana Muhadjili agakina nka rutahizamu rukumbi.

Petrovic yaje kuvumbura ko Hakizimana Muhadjili atari kwisanga neza mu mwanya wo gukina nka rutahizamu kuko atabonaga uko agenzura imipira agana mu izamu, ku munota wa 41’ w’umukino akuramo Nshimiyimana Amran yinjiza Byiringiro Lague waje akina nka rutahizamu bityo Hakizimana Muhadjili asa naho amujya inyuma gato.

Ku munota wa 56’ APR FC bongeye gukora impinduka bakuramo Nshuti Dominique Savio bashyiramo Sekamana Maxime ubwo umukino wari ugeze ku munota wa 66’. Ku munota wa 70’ ni bwo Kimenyi Yves yavuye mu mukino kuko yagize ikibazo cy’umutsi wo mu kibero ahita asimburwa na Ntaribi Steven nawe waje kwinjizwa igitego nyuma y’iminota icumi gusa.

11 bahuye na Gicumbi FC hari habayemo impinduka imwe gusa kuko Buregeya Prince (Ubanza iburyo imbere) yasimbuwe na Nsabimana Aimable

Ku ruhande rwa Singida United, Eliuter Mpedo yasimbuwe na Hendrick Somaeb ku munota wa 76’ naho Kenny Ally asimburwa na Kazungu Mashauri ku munota wa 88’ mbere gato ko Buteera Andrew ahabwa ikarita y’umuhondo yanahawe Safik Batambuze wa Singida United bakanakuramo John Tibar wasimbuwe na Salum Chuku ku munota wa 90+3’.

APR FC iri mu itsinda rya Gatatu kumwe na;  Singida (Tanzania), Simba (Tanzania) na  Dakadaha (Somalia), izagaruka mu kibuga Kuwa Mbere tariki ya 2 Nyakanga 2018 ikina na Simba SC. Rayon Sports iri mu itsinda rya kabiri (B) kumwe na Gor Mahia (KE), Lydia Ludic (Burundi) and Ports (Djibouti), irajya mu kibuga kuri iki Cyumweru yambikana na Gormahia FC.

Abakinnyi babanje mu kibuga:

APR FC XI: Kimenyi Yves (GK,21), Ombolenga Fitina 25, Emmanuel Imanishimwe 24, Rugwiro Herve 4, Nsabimana Aimable 13, Mugiraneza Jean Baptiste Miggy (C,7), Buteera Andrew 20, Nshimiyimana Amrna 5, Iranzi Jean Claude 12, Nshuti Dominique Savio 27 na Hakizimana Muhadjili 10.

Singida United XI: Peter Mwanyika JR (GK,18), Kennedy Juma 15, Boniface Maganga 20, Shafik Batambuze 6, Salum Kipaga 5, Yusuph Kagoma 21, Eliuter Mpedo 19, Kenny Ally 8, Danny Lyanga 10, Habib Kyombo 9 na John Tibar 22.