Impuzamashyirahamwe y’umupira w’amaguru muri Afurika CAF yubashye ubusabe bwa FERWAFA yimura amatariki ikipe ya Rayon Sports yari kuzakiniraho na Rivers United. FERWAFA yari yasabye ko imikino yakwimurwa bitewe nuko amatariki asanzwe yari mu cyumweru cyo kwibuka ku nshuro ya 23 Abatutsi bazize Jenoside.
Nk’uko bigaragara ku rubuga rwa FERWAFA, iri shyirahamwe ryari ryandikiye CAF basaba ko umukino ubanza wari washyizwe mu cyumweru cya tariki ya 6-8 Mata 2017 na 13-15 Mata 2017 hakinwa umukino wo kwishyura.
Nyuma yuko CAF isuzumye iki cyifuzo yandikiye FERWAFA kuri iki Cyumweru yemera ko umukino ubanza wakwimurwa ugashyirwa mu cyumweru cya tariki 13-15 Mata 2017 hakinwa umukino ubanza mbere yo gukina umukino wo kwishyura tariki 23 Mata 2017.
Ubutumwa CAF yageneye FERWAFA buragira buti ” Mu rwego rwo guha agaciro Abatutsi bazize Jenoside yakorewe Abatutsi mu Rwanda mu 1994, CAF yahaye agaciro ubusabe bwa FERWAFA ndetse yemeza ko imikino ibiri yari kuzahuza Rayon Sports na Rivers United yakwimurwaho icyumweru kimwe. Bityo umukino ubanza ugakinwa ku wa 15-16 mbere y’umukino wo kwishyura kuwa 22 Mata 2017”.
Rayon Sports yageze mu mikino y’ijonjora rya gatatu nyuma yaho Onze Createurs (Mali) ihagarikiwe mu marushanwa ya CAF ndetse na FIFA. Gusa Rayon Sports yari yatomboye Onze Createurs nyuma yo gusezerera Wau Al Salaam (South Sudan) ku giteranyo cy’ibitego 6-0.
Rivers United yagiye mu mikino ya CAF Total Confederations Cup nyuma yo gusezererwa mu mikino na CAF Total Champions League itsinzwe na El-Merreikh ku giteranyo cy’ibitego 4-3. Umukino ubanza Rivers yari yatsinze ibitego 3-0 mbere yo kwishyurwa ibitego 4-0 mu mukino wo kwishyura.
Eng
RSS 
TANGA IGITECYEREZO