RFL
Kigali

Bugesera FC iheruka gutsinda Police FC irakira Mukura VS kuri uyu wa Gatandatu (Imikino iteganyijwe)

Yanditswe na: Mihigo Saddam
Taliki:9/03/2018 21:13
0


Kuri uyu wa Gatandatu tariki ya 10 Werurwe 2018 ni bwo ikipe ya Bugesera FC igomba kwakira Mukura Victory Sport mu mukino w’umunsi wa 15 wa shampiyona ugomba kubera ku kibuga cya Bugesera FC kiri i Nyamata saa Cyenda n’igice (15h30’).



Amanota atatu Bugesera FC iheruka yayakuye kuri Police FC nyuma yo kuyitsinda igitego 1-0 mu mukino w’umunsi wa 14 wa shampiyona, igitego cyatsinzwe na Farouk Ruhinda Saifi ku munota wa 78’.

Bugesera FC kuri ubu iri ku mwanya wa 11 n’amanota 17 n’umwenda w’ibitego bitanu (5). Irasabwa gutsinda uyu mukino nibura ngo ibe yakwisunika ikazarara ku mwanya wa karindwi (7) mu gihe Etincelles FC yaba yananiwe gutsinda cyangwa ngo inganye na Gicumbi FC mu mukino bafitanye kuri sitade Umuganda kuri uyu wa Gatandatu.

Ikipe ya Mukura Victory Sport yo iri ku mwanya wa munani (8) n’amanota 18 inazigamye ibitego bibiri muri shampiyona. Iyi kipe yambara umukara n’umuhondo iheruka kunganya na Kiyovu Sport kuri sitade Huye.

Bugesera FC izakina uyu mukino idafite abakinnyi nka Samson Ikechuku wamaze kubagwa mu ivi. Abandi nka Ndatimana Robert arashidikanwaho mu gihe Mugabo Ismael nawe afite ikibazo cy’imvune.

Mukura VS yo ntifite Hatungimana Basile ufite ikibazo cy’imvune unafite umudamu wamaze kwibaruka umwana w’umukobwa kuri uyu wa Kane. Mukura igomba gusesekara i Nyamata idafite abakinnyi bafite ibibazo by’imvune nka; Abou Ndayegamiye, Nkomeji Alexis, Kwizera Tresor, Cyiza Hussein. Hari kandi na Twagirayezu Fabien na Kimanuka Jean Claude.

Bugesera FC iramutse ikinnye nk'uko yabikoze ihura na Police FC byagorana ko Mukura VS yakwikura i Nyamata

Bugesera FC iramutse ikinnye nk'uko yabikoze ihura na Police FC byagorana ko Mukura VS yakwikura i Nyamata

Dore uko imikino iteganyijwe (15h30’):

Kuwa Gatandatu tariki 10 Werurwe 2018

-Bugesera Fc vs Mukura VS (Nyamata)

-Etincelles Fc vs Gicumbi Fc (Stade Umuganda)

Ku Cyumweru tariki 11 Werurwe 2018

-Kirehe Fc vs Police Fc (Kirehe)

-Miroplast Fc vs Sunrise Fc (Mironko )

-SC Kiyovu vs Amagaju Fc (Stade Mumena)

-Rayon Sports Fc vs Marines Fc (Stade de Kigali)

Kuwa Mbere tariki 12 Werurwe 2018

-AS Kigali vs Musanze Fc (Stade de Kigali)

Kuwa Kabiri tariki 13 Werurwe 2018

-APR Fc vs Espoir Fc (Stade de Kigali)

Abakinnyi batemerew gukina umunsi wa 15:

1.Benedata Janvier (AS Kigali)

2. Wai Yeka (Musanze Fc)

3. Mbogo Ally (SC Kiyovu)






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND