Ahabanza Imikino

BASKETBALL: Imikino y’amajonjora yasize Patriots na REG BBC zikomeje muri kimwe cya 2-AMAFOTO

Yanditswe na: Mihigo Saddam
Taliki:14/05/2018 16:35 0

Imikino ngaruka mwaka y’irushanwa ryo kwibuka Abatutsi bazize Jenoside muri Mata 1994 muri Basketball amakipe yarisobanuye birangira mu bagabo hakomeje amakipe arimo REG BBC na Patriots BBC akomeza mu cyiciro gikurikira.

Ni imikino yabaye kuva kuwa Gatanu tariki 11 kugeza ku Cyumweru tariki 13 Gicurasi 2018 hakinwa imikino isa naho yari yegeranye ariko amakipe yitwaye neza akomeza mu mikino ya kimwe cya kabiri igomba gukomeza kuwa Gatandatu tariki 19 Gicurasi 2018.

Mu cyiciro cy’abagabo, amakipe yari mu itsinda rya mbere (A) yari REG BBC, IPRC Kigali BBC, APR FC na NT U-18 mu gihe itsinda rya kabiri (B) ryari rigizwe na Espoir BBC, IPRC South BBC, UGB, Patriots BBC na Rusizi BBC.

Mu itsinda rya mbere (A) hazamutse REG BBC n’amanota atandatu (6) kuko yatsinze imikino yose yari ifite mu itsinda. APR BBC yazamutse ari iya kabiri n’amanota atanu (5). Mu itsinda rya kabiri (B), hazamutse Patriots BBC n’amanota umunani (8) iyoboye itsinda naho Espoir BBC iyigwa mu ntege n’amanota arindwi (7).

REG BBC yatangiye itsinda IPRC Kigali BBC amanota amanota 94-61, itsinda APR BBC amanota 76-62 nyuma yo kuba yari yatsinze NT U18 amanota 91-25. APR BBC yazamutse itsinze IPRC Kigali BBC amanota 80-67 , yatsinzwe na REG BBC amanota 76-62 ariko yari yatsinze NT U18 amanota 74-50.

Mu itsinda rya kabiri (B), Patriots BBC yakomeje idatsinzwe umukino n’umwe mu mikino ine yakinnye. Batangiye batsinda IPRC South BBC amanota 82-54, itsinda Espoir BBC amanota 70-62, inyagira Rusizi BBC amanota 102-38 mbere yo gutsinda amanota 80-35.

Ikipe ya Espoir BBC yazamutse ari iya kabiri n’amanota arindwi (7). Yatsinze UGB amanota 65-52, itsinda Rusizi BBC amanota 84-59 mbere yo gutsinda IPRC South BBC amanota 91-80.

Umunota wo kwibuka Abatutsi bazize Jenoside yabakorewe mu 1994 mu Rwanda

Umunota wo kwibuka abazize Jenoside yakorewe abatutsi mu 1994 mu Rwanda

Mu mikino ya kimwe cya kabiri, REG BBC yabaye iya mbere mu itsinda rya mbere (A) izahura na Espoir BBC yabaye iya kabiri mu itsinda rya kabiri (B), umukino uzakinwa kuwa Gatandatu tariki 19 Gicurasi 2018 saa Kumi (16h00’) naho APR BBC yabaye iya kabiri mu itsinda (A) izacakirane na Patriots BBC yabaye iya mbere mu itsinda B saa kumi n’ebyiri z’umugoroba (18h00’).

Icyiciro cy’abagore kigizwe na APR WBBC, Ubwumwe WBBC, NT U18 na IPRC South WBBC. Aba bazakina hagati yabo hazabarwe abafite amanota menshi (Round Robin). Mu mikino ibanza, Ubumwe WBBC yatsinze NTU18 amanota 62-57 naho APR WBBC itsinda IPRC South WBBC 70-63.

Dore uko amakipe azahura mu mikino ya ½:

Kuwa Gatandatu tariki 19 Gicurasi 2018

ABAGABO:

-REG BBC vs Espoir BBC (Club Rafiki, 16h00’)

-Patriots BBC vs APR BBC (Club Rafiki, 18h00’)

ABAGORE:

-IPRC South BBC vs NT-U18 (Remera ku kibuga gishya, 09h00’)

-APR WBBC vs Ubumwe WBBC (Remera ku kibuga gishya, 16h00’)

ABAKANYUJIJEHO:

-UGB vs Patriots BBC (CSK, 11h00’)

-Espoir BBC vs CSK (CSK, 13h00’)

Mbere ya buri mukino hagomba kuba umuota wo kwibuka