AS Vita Club izahura na Raja Casablanca mu mikino ya nyuma ya Total CAF Confederation Cup 2018

Umukino wa nyuma ubanza uzakinwa tariki 23 Ugushyingo 2018 mbere yuko uwo kwishyura uzaba kuwa 30 Ugushyingo 2018.

Umukino ubanza wahuje AS Vita Club na Al Masry mu Misiri wari warangiye amakipe yombi anganya 0-0 tariki 3 Ukwakira 2018 mbere yuko kuri uyu wa Gatatu tariki 24 Ukwakira 2018 haba umukino wa kabiri warangiye Florent Ibenge n’abahungu be batsinze ibitego 4-0.

Ibitego bya AS Vita Club byatsinzwe na Emomo Eddy Ngoyi wabonyemo bibiri (6’,39’), Jean Marc Makusu (75’) na Mukoko Batezadio (90+4’)

Raja Casablanca yageze ku mukino wa nyuma ku giteranyo (Aggregate) cy’ibitego 3-1 imbere ya Enyimba SC iheruka kunyagira Rayon Sports muri ½ cy’irangiza.

Umukino ubanza, Raja yari yatsinze Enyimba SC mu rugo igitego 1-0 mbere yo kuyitsinda ibitego 2-1 mu mukino wo kwishyura iwayo.

Ibitego bya Raja byatsinzwe na Zakaria Hadraf (45+1’) na Isiaka Oladuntoye wa Enyimba SC witsinze igitego ku munota wa 88’. Igitego cy’impozamarira cya Enyimba SC cyatsinzwe na Bashir Abdulrahman ku munota wa 89’ w’umukino.

AS Vita Club yageze ku mukino wa nyuma wa Total CAF Confederation Cup 2018

Mu gihe Raja Casablanca na AS Vita Club zizaba zihatanira igikombe cya Total CAF Confederation Cup 2018, Al Ahly na Esperence de Tunis bazaba bahatanira igikombe cy’amakipe yabaye aya mbere iwayo (Total CAF Champions League 2018).

Al Ahly yageze ku mukino wa nyuma ku nshuro yayo ya 12 nyuma yo gutsinda ES Setif ku giteranyo cy’ibitego 3-2 kuko umukino ubanza Al Ahly yatsinze ibitego 2-0 mbere yo gutsindwa ibitego 2-1 mu mukino wo kwishyura.

Esperence de Tunis yageze ku mukino wa nyuma ikuyemo Primiero de Agosto yo muri Angola ku giteranyo cy’ibitego 4-3. Umukino ubanza ES Tunis yatsinzwe igitego 1-0 mbere yo kwakira Primiero de Agosto ikayitsibura ibitego 4-2 mu mukino bivugwa ko ikipe ya Espernce de Tunis yafashe nabi Primiero de Agosto bityo bakabona intsinzi.

Al Ahly ifite ibikombe umunani by'amakipe yabaye aya mbere iwayo irashaka ikindi