Ahabanza Imikino

Amafoto yaranze umukino Mubumbyi yafashijemo AS Kigali kunyagira Mukura VS

Yanditswe na: Mihigo Saddam
Taliki:2/04/2017 9:40 0

Kuri uyu wa Gatandatu tariki 1 Mata 2017 ubwo hakinwaga imikino y’umunsi wa 22 wa shampiyona, Mubumbyi Bernabe rutahizamu wa AS Kigali yihimuye kuri Mukura Victory Sport ayinyagira ibitego 4-0 mu mukino wabereye kuri sitade ya Kigali.

Mu minsi yashize, Eric Nshimiyimana umutoza wa AS Kigali yakunze kuvuga ko agitegereje isegonda rya nyuma kuri uyu musore kugira ngo azagaruke mu bihe bye kandi ko igihe kizagera. Uyu mutoza yakunze kuvuga ko Mubumbyi ameze nk’umuntu ufite ideni ariko wabuze inyishyu bityo bigatuma ashaka gukora ibimurusha ingufu.

Isegonda rya nyuma ryatangiye kwigaragaza ubwo yafunguraga amazamu ku munota wa 22’ (Penaliti), 26’ na 30’ y’igice cya mbere amakipe akabona kujya kuruhuka.

Ikipe ya Mukura Victory Sport itabaniwe n’umunyezamu Kimanuka Jean Claude, yaje kubona igitego cy’impozamarira ku munota wa 81’ gitsinzwe na Cyiza Hussein mbere yuko Mubumbyi Bernabe yinjiza igitego cya kane (4), agashinguracumu ka AS Kigali.

Aya manota atatu yatumye AS Kigali iba yicaye ku mwanya wa gatatu n’amanota 43 inganya na Police FC iri ku mwanya wa kabiri kuko izigamye ibitego 15 kuri 14 bya AS Kigali.

Abakinnyi babanje mu kibuga:

AS Kigali: Batte Shamiru (GK);Kayumba Soter ©, Mutijima Janvier, Tubane James, Bishira Latif, Murengezi Rodrigue, Ntamuhanga Tumaine, Ntwari Evode, Mubumbyi Barnabe,Toto Clement na Cyubahiro Janvier.

Mukura Victory Sport: Kimanuka Jean Claude (GK), Simpenzwe Hamidou, Manirareba Ambriose, Twagirayezu Fabien, Kagabe Jean Claude, Habimana Youssuf, Hakizimana Kevin, Niyonzima Ally, Bukuru Christopher, Ndayishimiye Christopher na Samba Christopher

AS Kigali