48% by’igihe CAF imaze yari mu maboko ya Issa Hayatou wasimbuwe na Ahmad Ahmad

Mu myaka 60 ishize habayeho CAF yanyuzwemo abaperezida batandatu mbere yuko Ahmad Ahmad yicara muri uyu mwanya kuwa Kane tariki 16 Werurwe 2017 asimbuye Issa Hayatou wari umaze imyaka 29 ayiyobora kuva mu 1988. Mu matora yabaye kuwa 16 Werurwe 2017 i Addis Ababa, Umunya-Cameron Issa Hayatou yatsinzwe ku bwiganze bw’amajwi 34 ya Ahmad Ahmad mu gihe Hayatou yari afite amajwi 20.

Issa yabaye muri CAF imyaka 29 ihwanye na 48.3%  by’imyaka 60 iyi mpuzamashyirahamwe rimaze rivutse kuko mu bayobozi yasimbuye uwayoboye igihe kinini yamazemo imyaka 15 (Yidnekatchew Tessema).

Mu 2000 ubwo Issa Hayatou yatorerwaga manda ya kabiri byagaragaye ko afite imbaraga zo kuba yatorwa ku majwi menshi kuko icyo gihe yatowe ku bwiganze bw’amajwi 47 mu gihe umunya-Angola Armando Machado yatahanye amajwi ane (4). Afata intebe ya CAF bwa mbere, Issa Hayatou yari yatowe ku bwiganze bw’amajwi 46 kuri atandatu (6) ya Ismail Bhamjee (Botswana).

Gusa kuwa Kane ubwo yari ategereje manda ya munani nawe yari abizi neza ko bitari bumworohere nk’uko abasesenguzi b’umupira w’amaguru muri Afurika bagiye babigarukaho kuko Ahmad Ahmad ukomoka muri Madagascar yari ashyigikiwe n’abashaka impinduka muri CAF.

Issa Hayatou yabonye izuba kuwa 9 Kanama 1946 (Imyaka 70), avukira mu gace ka Garoua muri Camron. Hayatou nta mateka afite mu mupira w’amaguru nk’umukinnyi cyangwa umutoza, ahubwo azwi cyane muri Basketball no mukino wo gusiganwa ku maguru (Athletisme). Yabaye perezida wa FIFA w’agateganyo ubwo Sepp Blatter yari amaze guhagarikwa kubera ibyaha bya ruswa (2016).

Mu 2002 ubwo habaga amatora yo gushyiraho perezida wa FIFA, Issa Hayatou yatsinzwe na Sepp Blatter. Icyo gihe Issa yari muri komite mpuzamahanga olempike. Uretse kuba yararanzwe no kugerwa amajanja aregwa uburiganya bwa ruswa no kuba indangare ku iterambere ry’umupira w’amaguru wa Afurika, Issa Hayatou yagiye azana umubano mwiza hagati ya CAF n’amashyirahamwe akomeye mu mupira w’amaguru arimo nka UEFA.

Nk’umukinnyi, Hayatou yigeze gutwara umudali mu kwiruka metero 400 na 800 mbere yo kuba mu ikipe y’igihugu ya Cameron mu mukino wa Basketball mu 1965 ubwo bari bagiye mu mukino ya All Africa Games (Congo BrazzaVille) ndetse akaba yaranabaye umukinnyi w’umupira w’amaguru ku rwego za kaminuza. Ibi yabibayemo mu 1964-1971.

 Dore abayobozi bayoboye CAF:

•  Abdel Aziz Abdallah Salem (1957-1958)

• Abdel Aziz Moustafa (1958-1968)

• Abdel Halim Muhammad (1968-1972)

• Yidnekatchew Tessema (1972-1987)

• Abdel Halim Muhammad (1987-1988)
• Issa Hayatou (1988-2017)
• Ahmad Ahmad (2-017-)

Ahmad Ahmad watorewe kuyobora CAF